ශ්‍රී ලංකාව, මාධ්‍යවේදීන්ට සිය රාජකාරි කටයුතු කිරීමට ‘අසීරු’ රටක් ලෙස දේශ සීමා රහිත වාර්තාකරුවෝ (Reporters Without Borders – RSF) සංවිධානය ලැයිස්තුගත කර තිබේ.
ඒ ඒ රටවල මාධ්‍ය නිදහස සම්බන්ධයෙන් සකස් කරනු ලැබු ලැයිස්තුවේ 127 වැනි ස්ථානයේ ශ්‍රී ලංකාව ලැයිස්තුගත කර ඇත.
එමෙන්ම එම සංවිධානය ‘මාධ්‍ය නිදහසේ භක්ෂකයන්’ නමින් නිකුත් කරනු ලැබූ මාධ්‍ය නිදහස සීමා කරන රාජ්‍ය නායකයන්ගේ එකතුවට ශ්‍රී ලංකාවේ ජනාධිපති ගෝඨාභය රාජපක්ෂ ද ඇතුළත් කර තිබේ.
මාධ්‍ය නිදහස සම්බන්ධයෙන් සකස් කරනු ලැබූ ලැයිස්තුවේ පළමු ස්ථාන දහය වන්නේ පිළිවෙලින් නෝර්වේ රාජ්‍යය, ෆින්ලන්තය, ස්වීඩනය, ඩෙන්මාර්කය, කොස්ටාරිකා, නෙදර්ලන්තය, ජැමෙයිකාව, නවසීලන්තය, පෘතුගාලය සහ ස්විට්සර්ලන්තය ය.
එම ලැයිස්තුවේ අවසන් ස්ථාන දහය, එනම් මාධ්‍යවේදීන් සඳහා අවම නිදහසක් ඇති රටවල් දහය වන්නේ කියුබාව, ලාඕසය, සිරියාව, ඉරානය, වියට්නාමය, ඩිජිබවුටි, චීනය, ටර්ක්මෙනිස්තානය, උතුරු කොරියාව සහ එරිත්‍රියාව යන රටවල් වේ.
2015 වන විට මාධ්‍ය නිදහස සහිත රටවල් අතරින් 165 වැනි ස්ථානයේ පැවති ශ්‍රී ලංකාව 2019 වන විට 126 දක්වා ඉදිරියට පැමිණ තිබූ අතර 2020 වසරේ එය නැවත 127 දක්වා පසු බැස්සේය.
ශ්‍රී ලංකාව එම ලැයිස්තුවේ 2013 සිට මේ දක්වා ලැයිස්තුගත වී ඇති ආකාරය
-
2013 – 162
-
2014 – 165
-
2015 – 165
-
2016 – 142
-
2017 – 141
-
2018 – 131
-
2019 – 126
-
2020 – 127
-
2021 – 127
