පාසල් දරුවන්ගෙන් සියයට 60කට සම අධ්‍යාපන අයිතිය අහිමි වෙලා : ජනාධිපති කාර්යසාධක බලකාය කරන්නේ මොනවාද ? – ලංකා ගුරු සංගමය ප්‍රශ්න කරයි !

සෑම දරුවෙකුටම සම අධ්‍යාපන අවස්ථා හිමිවිය යුතුය යන මූලික මිනිස් අයිතිවාසිකම ලක්ෂ 43ක් පමණ වන පාසල් දරුවන්ගෙන් සියයට 60ක් හෝ ඊටත් වැඩි අති බහුතරයකට අහිමි වී ඇතැයි ලංකා ගුරු සංගමය අවධාරණය කරයි.
මේ සම්බන්ධයෙන් වගවීමකින් තොරව සිටින ජාතික අධ්‍යාපන ආයතනය හා අධ්‍යාපන අමාත්‍යාංශය දරුවන්ගේ අනාගතය අවිනිශ්චිත තත්ත්වයකට ඇද දමා ඇතැයි ද එම සංගමය කියයි. කෝවිඩ්-19 වසංගත තත්ත්වය තුළ අඩපණ වන පාසල් අධ්‍යාපනය නඟාසිටුවීමේ වැඩපිළිවෙලක් සකස් කිරීම සඳහා ජනාධිපතිවරයා විසින් පත්කරන ලද අධ්‍යාපනය පිළිබඳ කාර්ය සාධක බලකාය මගින් ද අඩපණ වූ පාසල් අධ්‍යාපනය සම්බන්ධයෙන් කිසිදු වැඩපිළිවෙක් ක්‍රියාත්මක කර නැතැයි එම සංගමය පෙන්වා දෙයි.
නිවේදනයක් නිකුත් කරමින් එම සංගමය මේ බව සඳහන් කරයි.

අනාගත අවදානමක්

නිසි පරිදි සිදු නොවන මාර්ගගත ඉගැන්වීම් නිසා අධ්‍යාපනයෙන් පිටමංවන මෙම දරුවන් ළමා ශ‍්‍රමිකයන් මෙන්ම ලාභ ශ‍්‍රමිකයන් බවට පත්වීම මෙන්ම සමාජ අපචාරයන්ගේ ගොදුරු බවට පත්වීම වැළැක්විය නොහැකි බව ද ලංකා ගුරු සංගමය අවධාරණය කරයි. මාර්ගගත ක‍්‍රමයට අධ්‍යාපනය ලැබීමේ අවම පහසුකම් හිමි දරුවන්ට ද මේ වන විට අධ්‍යාපනය එපා වී තිබීම දැඩි අවධානය යොමු කළ යුතු තත්ත්වයක් බව එම සංගමය අදාළ නිවේදනය මගින් පවසයි.
පන්ති කාමර අධ්‍යාපනයට ගැළපෙන පරිදි සකස් කර ඇති විෂය මාලාවක් මාර්ගගත අධ්‍යාපනය ලැබීමට අවශ්‍ය වන පරිගණකයක් හා වේගවත් අඛණ්ඩ අන්තර්ජාල සබඳතාවක් නොමැතිව කුඩා ස්මාර්ට් දුරකතන තිරයකින් සහ බාධා සහිත අන්තර්ජාල සම්බන්ධතා ඔස්සේ අධ්‍යයනය කිරීමට සිදුවීම දරුවන්ට කරුමයක් වී ඇතැයි එම සංගමය සඳහන් කරයි. එසේ ගුරුවරු ස්වේච්ඡාවෙන් සිදු කරන කාර්යය අධීක්ෂණය කිරීමට මේ වන විට අධ්‍යාපන බලධාරීන් සහ අධ්‍යාපන අමාත්‍යාංශය කටයුතු කිරීම ගුරුවරුන්ට කරන අනිසි මෙන්ම අනීතික බලපෑමක් බව ද, එම බලපෑම් පළාත් අධ්‍යාපන බලධාරීන්, කලාප අධ්‍යාපන අධ්‍යක්ෂවරුන් හා විදුහල්පතිවරුන් වෙතින් ලිඛිතවම ගුරුවරුන් වෙත යොමුකෙ⁣රෙන බව ද ගුරුවරුන්ගේ කාර්ය සාධනය හා වැටුප් වර්ධක නිර්දේශ කිරීම සම්බන්ධයෙන් ද මෙම මාර්ගගත අධ්‍යාපන කටයුතු ඉවහල් කරගන්නා බවට සමහර අධ්‍යාපන බලධාරීන් සඳහන් කර ඇති බව ද ලංකා ගුරු සංගමය කියයි.

බලපෑම්වලට විරෝධය

එසේම මාර්ගගත අධ්‍යාපනයේ යෙදෙන සමහර පාසල්වල ගුරුවරියන්ට සාරි ඇඳීමට බලකිරීම, ගුරුවරුන්ට ටයි පැළඳීමට බලකිරීම, දරුවන්ට නිවසේදීත් නිල ඇඳුම් ඇඳීමට බලකිරීම, ගුරුවරුන්ට අනිවාර්යයෙන්ම පරිගණකයක් භාවිත කරන ලෙසට බලපෑම් කිරීම වැනි බලපෑම් සිදුවෙමින් පවතින බවත්, මෙම අනීතික හා අනිසි බලපෑම් සම්බන්ධයෙන් ගුරුවරු දැඩි විරෝධය දැක්විය යුතුව ඇති බවත් එම සංගමය පෙන්වා දෙයි.
සම අධ්‍යාපන අවස්ථා අහිමි කරන, අසාර්ථක මාර්ගගත අධ්‍යාපනය වෙනුවට කෝවිඩ් 19 වසංගත තත්ත්වය තුළ කඩාවැටුණු පාසල් අධ්‍යාපනය පවත්වාගෙන යෑමට විධිමත් වැඩපිළිවෙලක් ක්‍රියාත්මක කළ යුතු බවට නිරන්තරයෙන් අධ්‍යාපන බලධාරීන්ට අවධාරණය කර සිටියද, ඔවුන් නෑසූ කන්ව සිටීම බරපතළ ගැටළුවක් බව ලංකා ගුරු සංගමය කියයි. අධ්‍යාපනය සඳහා නූතන තාක්ෂණය භාවිත කිරීම තමන් කිසිවිටෙකත් ප‍්‍රතික්ෂේප නොකරන බවත්, ලංකා ගුරු සංගමය හැමවිටම අවධාරණය කරනුයේ නිදහස් අධ්‍යාපන අයිතිය සුරකිමින් සැමට සම අධ්‍යාපන අවස්ථා ලබාදීමේ අවශ්‍යතාව බවත් එම සංගමය පවසයි. නූතන තාක්ෂණය, නව මෙවලම් ගුණාත්මක අධ්‍යාපනයක් වෙනුවෙන් යොදා ගත යුතු බව ද ඒවා වරප‍්‍රසාදිත පිරිසකට සීමා නොවී සියලු පාසල් දරුවන්ට එකසේ භාවිත කළ හැකි ක‍්‍රමවේද අධ්‍යාපන පද්ධතිය තුළ ස්ථාපිත කළ යුතු බව ද එසේ නොමැතිව මාර්ගගත අධ්‍යාපනය එකම විකල්පය කරගැනීමෙන් ඉහත තත්ත්වය නිර්මාණය වී ඇති බව ද එම සංගමය වැඩිදුරටත් සඳහන් කරයි.

එකම විකල්පය ද?

ලංකා ගුරු සංගමය අදාළ නිවේදනයේ මෙසේ ද සඳහන් කරයි.
‘කෝවිඩ් 19 වසංගත තත්ත්වය තුළ 2020 මාර්තු මස ලංකාවේ පාසල් පද්ධතිය වසා දමා මේ වන විට වසරකට වැඩි කාලයක් ගත වී ඇත.
වසංගත ව්‍යාප්තිය පාලනය වූ අවස්ථාවලදී වරින්-වර පාසල් විවෘත වුවද, එම විවෘත කිරීම් සති කිහිපයකට සීමා වූ අතර, දරුවන් කොටස් වශයෙන් පාසල්වලට කැඳවීම තුළ එම කාලයේ ද පාසල් අධ්‍යාපනය මුළුමනින්ම විධිමත් නොවීය. වසංගතය තුළ පාසල් විවෘත කිරීම කළ නොහැකි වුවද කනගාටුදායක තත්ත්වය වන්නේ වසරකට වැඩි කාලයක් බිඳවැටී ඇති පාසල් අධ්‍යාපනය විධිමත්ව පවත්වාගෙන යෑමට අධ්‍යාපන අමාත්‍යාංශය කටයුතු නොකිරීමයි. වසංගතය ආරම්භ වූ මුල් මාස තුන ඇතුළත පාසල් අධ්‍යාපනය පවත්වාගෙන යෑම සම්බන්ධයෙන් විකල්ප විධිමත් වැඩපිළිවෙලක් සකස් කළ යුතුව තිබුණ ද, ඒ සම්බන්ධයෙන් කිසිවක් නොකළ අධ්‍යාපන අමාත්‍යාංශයේ එකම විකල්පය වී ඇත්තේ මාර්ගගත (online) ක‍්‍රමයට අධ්‍යාපනය ලබාදීමයි.
වසරකට වැඩි කාලයක් තිස්සේ මාර්ගගත අධ්‍යාපනයට ද අවශ්‍ය උපාංග, අන්තර්ජාල පහසුකම් හා අවශ්‍ය පුහුණුව ලබාදීමට අදාළ කිසිදු ක‍්‍රමවේදයක් අධ්‍යාපන අමාත්‍යාංශය විසින් ක්‍රියාත්මක කර නැති අතර, අධ්‍යාපන අමාත්‍යාංශ වෙබ් අඩවියේ සඳහන් වන්නේ ‘මේ වන විට දරුවන් සඳහා ක්‍රියාත්මක කෙරෙන මාර්ගගත අධ්‍යාපනය පන්තිකාමර අධ්‍යාපනයට විකල්පයක් නොවන බවත්, සමස්ත ලෝකයම මුහුණ දී ඇති කෝවිඩ් 19 අර්බුදය හමුවේ මෙය ඉතා ප‍්‍රායෝගික වැඩපිළිවෙක් බවත්’ 2021 මැයි 10 සඳුදා දින පැවති මාධ්‍ය සාකච්ඡාවකදී අධ්‍යාපන අමාත්‍ය මහාචාර්ය ජී.එල්. පීරිස් මහතා ප‍්‍රකාශ කළ බවයි. අධ්‍යාපන අමාත්‍යවරයාගේ මෙම හාස්‍යජනක ප‍්‍රකාශයෙන් ම බිඳවැටී ඇති අධ්‍යාපනය සම්බන්ධයෙන් ආණ්ඩුවේ ස්ථාවරය පැහැදිලි වේ.

සියයට 60ක් දරුවන්ට සිදුවන අසාධාරණය

කොළඹ විශ්වවිද්‍යාලයේ ජ්‍යෙෂ්ඨ කථිකාචාර්යවරයෙකු වූ ආචාර්ය ප‍්‍රදීප් එන්. වීරසිංහ මහතා විසින් රචිත ලිපියකින් පෙන්වා දී තිබුණේ මේ වන විට මෙරට සිසුන්ගෙන් සියයට 60ක් අධ්‍යාපනයෙන් බැහැර කර ඇති බවයි. මෙම අභාග්‍ය සම්පන්න තත්ත්වය උදා වී ඇත්තේ කෝවිඩ් 19 තත්ත්වය තුළ බිඳවැටුණු පාසල් අධ්‍යාපනය පවත්වාගෙන යෑම වෙනුවෙන් වූ අධ්‍යාපන අමාත්‍යවරයා සඳහන් කළ ඉතා ප‍්‍රායෝගික වැඩපිළිවෙලේ මහිමයෙනි.
ලංකාවේ අධ්‍යාපනය සම්බන්ධයෙන් වගකීම දරන අධ්‍යාපන අමාත්‍යාංශය යටතේ පවතින ආයතනයක් වූ ජාතික අධ්‍යාපන ආයතනය ද ඉහත තත්ත්වයට ඍජුවම වගකිව යුතුය. විශේෂයෙන් ම විෂය මාලා සකස් කිරීම හා සංවර්ධනය කිරීමේ කටයුත්ත සිදුකරන ජාතික අධ්‍යාපන ආයතනය මෙම වසංගත තත්ත්වය හමුවේ අධ්‍යාපනය පවත්වාගෙන යෑමට සුදුසු ආකාරයෙන් විෂය මාලා සංශෝධනයක් කළ යුතුව තිබිණි. එමෙන්ම රූපවාහිනිය වැනි ප‍්‍රාසාංගික මාධ්‍ය භාවිතයෙන් නිවෙස්වලට කොටු වී සිටින සිසුන් ආකර්ෂණය වන ආකාරයෙන් අධ්‍යාපනය ලබාදීමේ වැඩපිළිවෙලක් සකස් කළ යුතුව තිබිණි. ජාතික අධ්‍යාපන ආයතනය මෙතෙක් එවැන්නක් සිදුනොකිරීම තුළින් පැහැදිලි වන්නේ අධ්‍යාපනය සම්බන්ධයෙන් වූ තම වගකීම එම ආයතනය මුළුමනින් ම පැහැර හැර ඇති බවයි.

ජනාධිපති කාර්යසාධක බලකාය

කෝවිඩ් 19 වසංගත තත්ත්වය තුළ අඩපණ වන පාසල් අධ්‍යාපනය නඟාසිටුවීමේ වැඩපිළිවෙලක් සකස් කිරීම ප‍්‍රමුඛ කාර්යයක් කරමින් ජනාධිපතිවරයා විසින් 2020 මාර්තු 31 දින 2169/2 අංකයෙන් යුතු අතිවිශේෂ ගැසට් පත‍්‍රයකින් අධ්‍යාපනය පිළිබඳ කාර්යසාධක බලකායක් පත්කරන ලදි. එහෙත් මෙම කාර්යසාධක බලකායෙන් ද අඩපණ වූ පාසල් අධ්‍යාපනය සම්බන්ධයෙන් කිසිදු වැඩපිළිවෙක් සකස් කර ක්‍රියාත්මක නොවීය.
මාර්ගගත ක‍්‍රමයට අධ්‍යාපනය ලැබීමේ අවම පහසුකම් හිමි දරුවන්ට ද මේ වන විට අධ්‍යාපනය එපා වී තිබීම දැඩි අවධානය යොමු කළ යුතු තත්වයකි. මාර්ගගත අධ්‍යාපනය ලැබීමට අවශ්‍ය වන පරිගණකයක් හා වේගවත් අඛණ්ඩ අන්තර්ජාල සබඳතාවකින් තොරව කුඩා ස්මාර්ට් දුරකතන තිරයකින්, බාධා සහිත අන්තර්ජාල සම්බන්ධතා මගින් පන්ති කාමර අධ්‍යාපනයට සකස් කරන ලද විෂය මාලාවක් ඔස්සේ අධ්‍යාපනය ලැබීම දරුවන්ට කරුමයක් වී ඇත. පැය ගණනාවක් කුඩා ස්මාර්ට් දුරකතන තිරයක් දෙස බලා සිටීම දැඩි වෙහසකාරී මෙන්ම අනතුරුදායී තත්ත්වයකි. මේ තුළ වඩාම ඛේදනීය තත්වයකට ගොදුරුව ඇත්තේ 1 ශ්‍රේණියේ සිට 5 ශ්‍රේණිය දක්වා වූ ප‍්‍රාථමික ශ්‍රේණිවල දරුවන් ය.

විශේෂඥ උපදෙස් – දරුවන් අවදානමක

මාර්ගගත අධ්‍යාපනයේ අනතුරුදායක තත්ත්වය සම්බන්ධයෙන් පේරාදෙණිය විශ්වවිද්‍යාලයේ වෛද්‍ය පීඨයේ ජ්‍යෙෂ්ඨ කථිකාචාර්ය වෛද්‍ය පබාසරී ගිනිගේ මහත්මිය තම ෆේස්බුක් ගිණුමේ සටහනක් තබමින් පවසන්නේ ‘වසංගතය තුළ චර්යාත්මක හා චිත්තවේගීය ගැටළු සහිත දරුවන් වැඩි-වැඩියෙන් උදව් සඳහා රැගෙන එමින් පවතී. ඔන්ලයින් ඉගැන්වීම් සහ අධ්‍යාපනයේ පීඩනය ඔවුන්ට දරාගත නොහැකි බරකි. දෙමාපියන්ගෙන් සහ ගුරුවරුන්ගෙන් වගකීමෙන් ඉල්ලා සිටිනුයේ මේ පිළිබඳව දැඩි අවධානය යොමු කරන ලෙසයි. සමහර කුඩා’වුන් මත පටවන බර අපගේ වෛද්‍ය ශිෂ්‍යයන්ටවත් අප දෙන්නේ නැත.’ යනුවෙනි. මාර්ගගත අධ්‍යාපනයේ නොපෙනෙන බියජනක තත්ත්වය එයින් පිළිබිඹුව තිබිණි. එසේම මානසික රෝග පිළිබඳ විශේෂඥ වෛද්‍යවරයෙකු වූ රූමි රූබන් මහතා, අක්ෂි වෛද්‍යවරු ඇතුළු වෛද්‍යවරුන් ගණනාවක් විසින් විවිධ අවස්ථාවලදී මෙම අනතුරුදායක තත්ත්වයන් පිළිබඳව පෙන්වා දී තිබුණද, අධ්‍යාපන බලධාරීන් ඒ සම්බන්ධයෙන් කිසිදු තැකීමක් නොකර මාර්ගගත අධ්‍යාපනය පවත්වාගෙන යෑමට ගුරුවරුන්ට දැඩි බලපෑම් එල්ල කරමින් සිටී.
මෙම තත්ත්වය මාර්ගගත ක‍්‍රමයට අධ්‍යාපනය ලබාදෙන ගුරුවරුන්ට ද දැඩි ලෙස පීඩාකාරී වන අතර, ඔවුන් තම සොච්චම් වැටුපෙන් තමන් විසින්ම සපයාගන්නා ලද පෞද්ගලික උපාංග භාවිත කරමින් තම වියදමින් අන්තර්ජාල සම්බන්ධතා සපයා ගනිමින් දරුවන්ට ඉගැන්වීම සිදුකරයි.
සම අධ්‍යාපන අවස්ථා අහිමි කරන, අසාර්ථක මාර්ගගත අධ්‍යාපනය වෙනුවට කෝවිඩ් 19 වසංගත තත්ත්වය තුළ කඩාවැටුණු පාසල් අධ්‍යාපනය පවත්වාගෙන යෑමට විධිමත් වැඩපිළිවෙලක් ක්‍රියාත්මක කළ යුතු බව ලංකා ගුරු සංගමය නිරන්තරයෙන් අධ්‍යාපන බලධාරීන්ට අවධාරණය කර සිටියද, ඔවුන් නෑසූකන්ව සිටීම බරපතළ ගැටළුවකි. අධ්‍යාපනය සඳහා නූතන තාක්ෂණය භාවිත කිරීම අප කිසිවිටෙකත් ප‍්‍රතික්ෂේප නොකරන අතර, අප විසින් හැමවිටම අවධාරණය කරනුයේ නිදහස් අධ්‍යාපන අයිතිය සුරකිමින් සැමට සම අධ්‍යාපන අවස්ථා ලබාදීමේ අවශ්‍යතාවයයි. නූතන තාක්ෂණය, නව මෙවලම් ගුණාත්මක අධ්‍යාපනයක් වෙනුවෙන් යොදා ගත යුතු අතර, ඒවා වරප‍්‍රසාදිත පිරිසකට සීමා නොවී සියලු පාසල් දරුවන්ට එකසේ භාවිත කළ හැකි ක‍්‍රමවේද අධ්‍යාපන පද්ධතිය තුළ ස්ථාපිත කළ යුතුය. එසේ නොමැතිව මාර්ගගත අධ්‍යාපනය එකම විකල්පය කරගැනීමෙන් ඉහත තත්ත්වය නිර්මාණය වී ඇත.’
Previous articleදින 408කට පසු හිජාස්ට මව සමඟ කතා කරන්න අවස්ථාව 
Next articleමහජනතාව අපහසුතාවට පත්කිරීම වහාම නවත්වන්න – පොලිස්පතිගෙන් නියෝගයක් !

ඔබේ අදහස්

Please enter your comment!
Please enter your name here