රටවල් 06ක් වෙනුවට 42ක් : මානව හිමිකම් කොමිසමේ සැසිවාරයට ලංකාවට එරෙහි තවත් යෝජනාවක් !

ස්විට්සර්ලන්තයේ ජිනීවා නුවර පැවැත්වෙන එක්සත් ජාතීන්ගේ මානව හිමිකම් කොමිසමේ මෙවර සැසිවාරයට යළිත් ශ්‍රී ලංකාවට එරෙහිව යෝජනාවක් ඉදිරිපත් කර තිබේ.

ඒ මීට පෙර ඉදිරිපත් කරන ලද යෝජනාව තවදුරටත් සංශෝධනය කරමිනි. මීට පෙර ඉදිරිපත් කළ යෝජනාව බරපතළ නොවන බවට රටවල් කිහිපයක් චෝදනා කර තිබූ අතර, ඉන්පසු මෙසේ එය වෙනස් කර ඉදිරිපත් කොට ඇත.

පෙර යෝජනාව රටවල් 06ක් විසින් ඉදිරිපත් කර තිබුණද, මේ නව යෝජනාව රටවල් 42ක යෝජනාවක් ලෙස සඳහන් වේ. එම රටවල් වන්නේ ඇල්බේනියාව, ඕස්ට්‍රේලියාව, ඔස්ට්‍රියාව, බෙල්ජියම, බල්ගේරියාව, කැනඩාව, ක්‍රොඒෂියාව, සයිප්‍රසය, චෙක් රාජ්‍යය, ඩෙන්මාර්කය, එස්තෝනියාව, ෆින්ලන්තය, ප්‍රංශය, ජර්මනිය, ග්‍රීසිය, අයිස්ලන්තය, අයර්ලන්තය, ඉතාලිය, ලැට්වියාව, ලිච්ටෙන්ස්ටයින්, ලිතුවේනියාව, ලක්සම්බර්ග්, මලාවි, මෝල්ටාව, මාර්ෂල් දූපත්, මොන්ටිනීග්‍රෝ, නෙදර්ලන්තය, නවසීලන්තය, උතුරු මැසිඩෝනියාව, නෝර්වේ, පෝලන්තය, පෘතුගාලය, රුමේනියාව, සැන් මරීනෝ, ස්ලෝවැකියාව, ස්ලෝවේනියාව, ස්පාඥ්ඥය, ස්වීඩනය, ස්විට්සර්ලන්තය, එක්සත් රාජධානිය, උතුරු අයර්ලන්තය සහ ඇමරිකා එක්සත් ජනපදය වේ.

පෙර කෙටුම්පත් යෝජනාව ඉදිරිපත් කර තිබුණේ එක්සත් රාජධානිය, කැනඩාව, ජර්මනිය, මලාවි, මොන්ටිනීග්‍රෝ සහ උතුරු මැසඩෝනියා යන රටවල් මගිනි.

2012 මාර්තු 22 දින 19/2, 2013 මාර්තු 21 දින 22/1, 2014 මාර්තු 27 දින 25/1, 2015 ඔක්තෝබර් 01 දින 30/1, 2017 මාර්තු 23 දින 34/1 සහ ශ්‍රී ලංකාවේ සංහිඳියාව, වගවීම හා මානව හිමිකම් ප්‍රවර්ධනය කිරීම පිළිබඳ 2019 මාර්තු 21 දින 40/1 යන මානව හිමිකම් කවුන්සිලයට මීට පෙර ඉදිරිපත් වූ යෝජනා එමගින් යළිත් සිහිපත් කර තිබේ.

2009 මැයි 27 දිනැති එස් – 11 / 1 යෝජනාව අනුව දේශපාලන විසඳුමක් සෙවීමට සහ දිගුකාලීන සාමය හා සංවර්ධනය ඇති කිරීම සඳහා සියලු පාර්ශ්ව සමඟ පුළුල් සංවාදයක් ආරම්භ කිරීමට ශ්‍රී ලංකාවේ අධිෂ්ඨානයක් තිබූ බව එහි සඳහන් වේ. සියලු ජනවාර්ගික හා ආගමික කණ්ඩායම්වල අයිතිවාසිකම් අතර ඇති එකඟතාව සහ ගෞරවය මත පදනම්ව ශ්‍රී ලංකා ජනාධිපතිවරයා සහ එක්සත් ජාතීන්ගේ මහ ලේකම්වරයා 2009 මැයි 26 වැනි දින ඒකාබද්ධ ප්‍රකාශයක් කළ බව ද එහි සඳහන් ය.

අන්තර්ජාතික මානුෂීය නීතිය සහ මානව හිමිකම් නීතිය උල්ලංඝනය කිරීම සම්බන්ධයෙන් වගවීමේ ක්‍රියාවලියක ඇති වැදගත්කම ද එම රටවල් අවධාරණය කරයි. ශ්‍රී ලංකාවේ ස්වෛරීභාවය, ස්වාධීනත්වය, සමගිය සහ භෞමික අඛණ්ඩතාව සඳහා වූ සිය කැපවීම පිළිගන්නා බවත්, මානව හිමිකම්වලට ගරු කිරීම සහ එහි සමස්ත ජනගහනයේ සියලු මානව හිමිකම් සහ මූලික නිදහස පූර්ණ ලෙස භුක්ති විඳීම සහතික කිරීම එක් එක් රාජ්‍යයේ මූලික වගකීම බවත් එම රටවල් අදාළ යෝජනාව මගින් අවධාරණය කරයි.

2019 නොවැම්බර් සහ 2020 අගෝස්තු මාසවල නිදහස්, සාධාරණ හා ප්‍රජාතන්ත්‍රවාදී මැතිවරණ පැවැත්වීම ද ඉන් අගය කර ඇති අතරම, ශ්‍රී ලංකා ආණ්ඩුක්‍රම ව්‍යවස්ථාවේ විසිවැනි ව්‍යවස්ථා සංශෝධනය බලාත්මක කිරීම පිළිබඳව සඳහන් කරමින් ප්‍රජාතන්ත්‍රවාදී පාලනයේ වැදගත්කම සහ ප්‍රධාන ආයතනවල ස්වාධීන අධීක්ෂණය පිළිබඳ අවධාරණය කර තිබේ.

සංහිඳියාව සහ මානව හිමිකම් පූර්ණ ලෙස භුක්ති විඳීමට අත්‍යවශ්‍ය වන දේශපාලන අධිකාරියේ බලය බෙදාහැරීම පිළිබඳ සිය කැපවීම් ඉටු කරන ලෙස එම රටවල් ශ්‍රී ලංකා රජයෙන් වැඩිදුරටත් ඉල්ලා සිටී. පළාත් පාලන ක්‍රමයට ගරු කිරීමට රජය දිරිමත් කළ යුතු බවත්, ශ්‍රී ලංකා ආණ්ඩුක්‍රම ව්‍යවස්ථාවේ දහතුන්වැනි ව්‍යවස්ථා සංශෝධනයට අනුකූලව, පළාත් සභා මැතිවරණ සහ උතුරු හා නැගෙනහිර පළාත් සභා ඇතුළු සියලුම පළාත් සභා ඵලදායී ලෙස ක්‍රියාත්මක වීම සහතික කළ යුතු බවත් එහි සඳහන් කර ඇත.
ආගම, විශ්වාසය හෝ ජනවර්ගය වැනි කිසිදු භේදයකින් තොරව ශ්‍රී ලංකාවේ සියලුම පුද්ගලයන්ට ඔවුන්ගේ මානව හිමිකම් පූර්ණ ලෙස භුක්ති විඳීමට අයිතිය ඇතැයිද, මානව හිමිකම් භුක්ති විඳීම සාමකාමී හා එක්සත් රටක ඇති වැදගත්කම යළිත් තහවුරු කරන බවද එම රටවල් පෙන්වා දෙයි.

එම වාර්තාවේ වැඩිදුරටත් මෙසේ ද දැක්වේ.

‘යටිතල පහසුකම් නැවත ගොඩනැගීම, බිම් බෝම්බ ඉවත් කිරීම, ඉඩම් ආපසු ලබාදීම, අභ්‍යන්තරව අවතැන්වූවන් නැවත පදිංචි කිරීම, ජීවනෝපායන් වැඩිදියුණු කිරීම ඇතුළු කටයුතු සම්බන්ධයෙන් ශ්‍රී ලංකා රජය ලබා ඇති ප්‍රගතිය අගය කරනවා.

මානව හිමිකම් බලතල හා යන්ත්‍රණය, ධාරිතා වර්ධනය, තාක්ෂණික සහාය සහ තිරසර සාමය ළඟා කර ගැනීම සඳහා එක්සත් ජාතීන්ගේ සංවිධානය සහ එහි නියෝජිත ආයතනවල සහාය ලබාගැනීම සඳහා ශ්‍රී ලංකා රජයේ අඛණ්ඩ කැපවීම සාදරයෙන් පිළිගන්නවා.

තුවාල සහ මරණ විශාල සංඛ්‍යාවක් සිදුකරමින් 2019 අප්‍රේල් මාසයේදී ශ්‍රී ලංකාවේ සිදු වූ ප්‍රහාරය ඇතුළුව සියලු ත‍්‍රස්තවාදී ක‍්‍රියා, ක‍්‍රමවේද සහ ක‍්‍රියාවලීන් හෙළා දැකිය යුතු බවත්, ත‍්‍රස්තවාදයට එරෙහිව සටන් කිරීම සඳහා ගනු ලබන සියලු පියවර ජාත්‍යන්තර නීතිය යටතේ ඇති බැඳීම්, විශේෂයෙන් ජාත්‍යන්තර මානව හිමිකම් නීති, ජාත්‍යන්තර සරණාගත නීති සහ ජාත්‍යන්තර මානුෂීය නීතිවලට සම්පූර්ණයෙන්ම අනුකූල විය යුතුයි.

අතීතය සමඟ ගනුදෙනු කිරීම, අධිකරණ හා අධිකරණ නොවන ක්‍රියාමාර්ග ඇතුළත් කිරීම, වගවීම සහතික කිරීම, යුක්තිය ඉටු කිරීම, වින්දිතයන්ට විසඳුම් ලබාදීම, මානව හිමිකම් උල්ලංඝණය කිරීම් නැවත ඇතිවීම වළක්වා ගැනීම සහ සංහිඳියාව ප්‍රවර්ධනය කිරීම සඳහා පුළුල් ප්‍රවේශයක වැදගත්කම අවධාරණය කරනවා.

අතීත අපරාධ සහ නීති උල්ලංඝණයන් මැඩපැවැත්වීම සඳහා යොදවන යන්ත්‍රණ ස්වාධීන, අපක්ෂපාතී හා විනිවිදභාවයකින් යුතු වූ විට ඒවා වඩාත් හොඳින් ක්‍රියාත්මක වේ.
වින්දිතයන්, කාන්තාවන්, තරුණයන්, විවිධ ආගම්වල සහ ජනවර්ගවල නියෝජිතයන්, ආන්තික කණ්ඩායම්වල පුද්ගලයන්ද ඇතුළුව, ඒවාට පමණක් සීමා නොවී අදාළ සියලු පාර්ශ්වකරුවන්ගේ අදහස් ඇතුළත් උපදේශන සහ ක්‍රමවේද භාවිත කළ යුතුයි.

ශ්‍රී ලංකාවේ මානව හිමිකම් සහ සත්‍යය, යුක්තිය, සංහිඳියාව සහ වගවීම ප්‍රවර්ධනය කිරීම හා ආරක්ෂා කිරීම සඳහා එක්සත් ජාතීන්ගේ මානව හිමිකම් මහ කොමසාරිස් කාර්යාලය කළ සේවය අගය කරනවා.

1. එක්සත් ජාතීන්ගේ මානව හිමිකම් පිළිබඳ මහ කොමසාරිස්වරිය විසින් 43 වැනි සැසිවාරයේදී මානව හිමිකම් කවුන්සිලය වෙත ඉදිරිපත් කරන ලද වාචික කරුණු ඉදිරිපත් කිරීම සහ 46 වැනි සැසිවාරයේදී සභාව වෙත ඉදිරිපත් කරන ලද එක්සත් ජාතීන්ගේ මානව හිමිකම් පිළිබඳ මහ කොමසාරිස් කාර්යාලයේ වාර්තාව සාදරයෙන් පිළිගන්නවා.

2. මහ කොමසාරිස් කාර්යාලය සමඟ ශ්‍රී ලංකා රජය කටයුතු කිරීම සහ මානව හිමිකම් කවුන්සිලයේ විශේෂ ක්‍රියා පටිපාටිය සාදරයෙන් පිළිගන්නවා. එවැනි කටයුතුවල හා සංවාදවල අඛණ්ඩ පැවැත්ම ඉල්ලා සිටින අතර, කාර්යාලය විසින් කරනු ලබන නිර්දේශ ක්‍රියාත්මක කරන ලෙසත්, විශේෂ ක්‍රියා පටිපාටි මගින් කරනු ලබන නිර්දේශ පිළිබඳව නිසි සැලකිල්ලක් දක්වන ලෙසත් ශ්‍රී ලංකාවෙන් ඉල්ලා සිටිනවා.

3. අතුරුදන්වූවන් පිළිබඳ කාර්යාලය සහ වන්දි ගෙවීමේ කාර්යාලය ලබා ඇති ප්‍රගතිය පිළිගන්නා අතර, මෙම ආයතන සඳහා සහයෝගය පවත්වාගෙන යෑමේ වැදගත්කම අවධාරණය කරනවා, ඔවුන්ගේ ස්වාධීන හා ඵලදායී ක්‍රියාකාරිත්වය ආරක්ෂා කිරීම, කාර්යාල දෙකටම ඔවුන්ගේ බලතල ඵලදායී ලෙස ඉටු කිරීම සඳහා ප්‍රමාණවත් සම්පත් හා තාක්ෂණික ක්‍රම ලබාදීම,  පීඩාවට පත් අවදානමට ලක් වූ පවුල් සඳහා ස්ත්‍රී-පුරුෂ සමාජභාවය කෙරෙහි අවධානය යොමුකර, අතුරු සහන පියවර ඉදිරියට ගෙනයෑම සහ බලහත්කාරයෙන් අතුරුදන් කිරීමේ සිද්ධි, අතුරුදන්වූවන්ගේ පවුල්වලට තම ආදරණීයයන්ගේ ඉරණම සහ ඔවුන් සිටින ස්ථානය දැනගැනීමට හැකිවන පරිදි විසඳීම.

4. ශ්‍රී ලංකාවේදී එල්ටීටීඊය විසින් සිදුකරන ලද අපරාධ ද ඇතුළුව සියලු පාර්ශ්ව විසින් ශ්‍රී ලංකාව තුළ සිදු කරන ලද සියලුම මානව හිමිකම් උල්ලංඝනයන් සම්බන්ධයෙන් මහ කොමසාරිස් කාර්යාලයේ සවිස්තර වාර්තාවෙන් අවධාරණය කර ඇති ආකාරය⁣ට පුළුල් වගවීමේ ක්‍රියාවලියක වැදගත්කම අවධාරණය කරයි.

5. දේශීය විමර්ශන කොමිෂන් සභාවට ස්වාධීනත්වයක් නොමැති බවත්, එහි බලය වන්නේ පෙර කොමිෂන් සභා සහ කමිටු පිළිබඳ වාර්තා සමාලෝචනය කිරීම බවත් අතීත මානව හිමිකම් උල්ලංඝනය කිරීම් හෝ ජාත්‍යන්තර මානුෂීය නීතිය බරපතළ ලෙස උල්ලංඝනය කිරීම සම්බන්ධයෙන් වගවීම සඳහා බලයක් නොමැති බවත් 2021 ජනවාරි 22 වැනිදා නිවේදනය කළ අතර, දේශීය යන්ත්‍රණවල වගවීම පිළිබඳ නිරන්තර අඩුපාඩුවක් එහිදී සටහන් කරයි.

6. ශ්‍රී ලංකාව තුළ මානව හිමිකම් උල්ලංඝනය කිරීම් සහ ඒ ආශ්‍රිත අපරාධ සම්බන්ධ සාක්ෂි වගවීම ඉදිරියට ගෙන යෑමේ අරමුණින් සංරක්ෂණය හා විශ්ලේෂණය කිරීමේ වැදගත්කම හඳුනාගත යුතු අතර, මහ කොමසාරිස් කාර්යාලයේ තොරතුරු එකතු කිරීමේ හැකියාව, තොරතුරු සහ සාක්ෂි ඒකාබද්ධ කිරීම, විශ්ලේෂණය කිරීම සහ ආරක්ෂා කිරීම ශක්තිමත් කිරීමට තීරණය කරයි. ශ්‍රී ලංකාවේ දළ වශයෙන් මානව හිමිකම් උල්ලංඝනය කිරීම් හෝ ජාත්‍යන්තර මානුෂීය නීතිය උල්ලංඝනය කිරීම, වින්දිතයන් සහ දිවි ගලවා ගත් අය වෙනුවෙන් පෙනී සිටීම, නිසි අධිකරණ බලය සහිත සාමාජික රටවල් ඇතුළුව අදාළ අධිකරණ හා වෙනත් කටයුතුවලට සහාය වීම සඳහා අනාගත වගවීමේ ක්‍රියාවලීන් සඳහා හැකි උපාය මාර්ග සංවර්ධනය කිරීම.

7. පසුගිය වසර තුළ මතුවෙමින් පවතින ප්‍රවණතා පිළිබඳව බරපතළ කනස්සල්ල පළකරන අතර, රජයේ සිවිල් ක්‍රියාකාරකම් වේගයෙන් මිලිටරිකරණය කිරීම; මානව හිමිකම් ප්‍රවර්ධනය හා ආරක්ෂා කිරීම සඳහා වගකිවයුතු අධිකරණයේ සහ ප්‍රධාන ආයතනවල ස්වාධීනත්වය අඩාල වීම; වැදගත් නඩුවලදී අපරාධ සහ මානව හිමිකම් උල්ලංඝනවලට දඬුවම් නොලැබීම සහ එම අපරාධ සඳහා වගවීමට දේශපාලන බාධා ඇති වීම; ආගමේ හෝ විශ්වාසයේ නිදහසට ඇති අයිතියට අහිතකර ලෙස බලපාන ප්‍රතිපත්ති; දෙමළ හා මුස්ලිම් ප්‍රජාවන්ට අයත් පුද්ගලයන් කොන්කිරීම් ඉහළ යෑම; සිවිල් සමාජ ක්‍රියාකාරීන් නිරීක්ෂණය කිරීම හා බිය ගැන්වීම; ජනමාධ්‍ය නිදහස සීමා කිරීම සහ ප්‍රජාතන්ත්‍රවාදී අවකාශය අවහිර කිරීම; ස්මාරක විනාශ කිරීම ඇතුළුව යුද්ධයට ගොදුරුවූවන් ප්‍රසිද්ධියේ අනුස්මරණය කිරීම සඳහා වූ සීමා ඇති කිරීම; අත්තනෝමතික ලෙස රඳවාගැනීම;  වධහිංසා පැමිණවීම සහ වෙනත් කුරිරු, අමානුෂික පහත් සැලකීම් හෝ දඬුවම් සහ ලිංගික හා ස්ත්‍රී-පුරුෂ සමාජභාවය මත පදනම් වූ හිංසනය ඇතුළුව ශ්‍රී ලංකාවේ මානව හිමිකම් පිරිහෙන තත්ත්වයක් පිළිබඳ පැහැදිලි පූර්ව අනතුරු ඇඟවීමේ සලකුණු පෙන්වයි. මෙම ප්‍රවණතා මෑත වසරවල ලබාගෙන ඇති සීමිත නමුත් වැදගත් වාසි ආපසු හැරවීමට තර්ජන එල්ල කරන අතර, අතීතයේ බරපතළ උල්ලංඝනයන්ට තුඩු දුන් ප්‍රතිපත්ති හා භාවිතයන් නැවත ඇතිවීමේ අවදානමක් තිබේ.
කොරෝනා වසංගතයට ප්‍රතිචාර දැක්වීම ආගමේ හෝ විශ්වාසයේ නිදහසට බලපෑමක් ඇති කර ති‌බෙන අතර, මුස්ලිම් ප්‍රජාවට එරෙහිව පවතින අන්තවාදී සහ වෙනස් කොට සැලකීම උග්‍ර කර ඇත. කොවිඩ්-19 ආසාදිතව මියගිය අය ආදාහනය කිරීම නිසා මුස්ලිම්වරුන්ට සහ වෙනත් ආගම්වල සාමාජිකයන්ට  අවසන් කටයුතු සම්බන්ධයෙන් ආගමික වත්පිළිවෙත් අනුගමනය කිරීම අවහිර කර ඇති අතර, ආගමික සුළුතරයට අසමාන ලෙස බලපා ඇත. එමගින් ඔවුන් පීඩාවට පත්ව ඇති අතර, ඔවුන්ගේ ආතතීන් උත්සන්න කර ඇත.

9. කඩිනම්, සවිස්තරාත්මක හා අපක්ෂපාතී පරීක්ෂණයක් සහතික කරන ලෙස ශ්‍රී ලංකා රජයෙන් ඉල්ලා සිටින අතර, මානව හිමිකම් උල්ලංඝනය කිරීම් හා ජාත්‍යන්තර මානුෂීය නීතිය බරපතළ ලෙස උල්ලංඝනය කිරීම්වලට සම්බන්ධ යැයි කියනු ලබන සියලු අපරාධවලට එරෙහිව නඩු පවරන ලෙස ඉල්ලා සිටී.
10. ශ්‍රී ලංකා මානව හිමිකම් කොමිෂන් සභාව, අතුරුදන්වූවන් පිළිබඳ කාර්යාලය සහ වන්දි ගෙවීමේ කාර්යාලය ස්ථාපිත කර ඇති පරිදි ඔවුන්ගේ බලය ලබාදෙන ලෙස ශ්‍රී ලංකා රජයෙන් ඉල්ලා සිටී.

11. මානව හිමිකම් ආරක්ෂා කරන්නන් ඇතුළු සිවිල් සමාජ ක්‍රියාකාරීන් ආරක්ෂා කරන ලෙසත්, ඕනෑම ප්‍රහාරයක් විමර්ශනය කරන ලෙසත්, සිවිල් සමාජයට බාධාකිරීම්, සෝදිසි කිරීම්, අනාරක්ෂිතභාවයන් සහ පළිගැනීමේ තර්ජනයෙන් තොරව ක්‍රියාත්මක විය හැකි ආරක්ෂිත හා සක්‍රීය පරිසරයක් සහතික කරන ලෙසත් ශ්‍රී ලංකා රජයෙන් ඉල්ලා සිටී.
12. ත්‍රස්තවාදය වැළැක්වීමේ පනත සමාලෝචනය කරන ලෙසත්, ත්‍රස්තවාදයට එරෙහිව සටන් කිරීම පිළිබඳ ඕනෑම ව්‍යවස්ථාවක් රජයේ ජාත්‍යන්තර මානව හිමිකම් සහ මානුෂීය නීති බැඳීම්වලට අනුකූල වන බවට සහතික කරන ලෙසත් ශ්‍රී ලංකා රජයෙන් ඉල්ලා සිටී.

13. සියලුම ආගමික ප්‍රජාවලට ඔවුන්ගේ ආගම ප්‍රකාශ කිරීමේ හැකියාව ප්‍රවර්ධනය කිරීමෙන් ආගමට හෝ විශ්වාසයට හා බහුවිධතාවට නිදහස ලබාදෙන ලෙසත්, විවෘතව හා සමාජයට සමාන පදනමක් මත දායක වන ලෙසත් ශ්‍රී ලංකා රජයෙන් ඉල්ලා සිටී.

14. ඔවුන්ගේ ඉල්ලීම්වලට විධිමත් ලෙස ප්‍රතිචාර දැක්වීම ඇතුළුව මානව හිමිකම් කවුන්සිලයේ විශේෂ ක්‍රියා පටිපාටි සමඟ අඛණ්ඩව සහයෝගයෙන් කටයුතු කිරීමට ශ්‍රී ලංකා රජය දිරිමත් කිරීමට අපේක්ෂා කරයි.

15. ඉහත සඳහන් පියවර ක්‍රියාවට නැංවීම සඳහා ශ්‍රී ලංකා රජයේ එකඟතාව, උපදේශනය සහ උපදෙස් හා තාක්ෂණික සහාය ලබාදීමට මහ කොමසාරිස් කාර්යාලය සහ අදාළ විශේෂ ක්‍රියා පටිපාටි දරන්නන් දිරිමත් කළ යුතුයි.

16. සංහිඳියාව හා වගවීමේ ප්‍රගතිය ඇතුළුව ශ්‍රී ලංකාවේ මානව හිමිකම් තත්ත්වය පිළිබඳ එහි අධීක්ෂණය සහ වාර්තාකරණය වැඩි දියුණු කරන ලෙසත්, මානව හිමිකම් කවුන්සිලයේ 48 වැනි සැසියේදී වාචික යාවත්කාලීන කිරීමක් ඉදිරිපත් කරන ලෙසත් මහ කොමසාරිස් කාර්යාලයෙන් ඉල්ලා සිටී.  එහි 49 වැනි සැසියේදී ලිඛිත යාවත්කාලීන කිරීමක් සහ එහි 51 වැනි සැසියේදී වගවීම ඉදිරියට ගෙනයෑම සඳහා තවත් විකල්ප ඇතුළත් පුළුල් වාර්තාවක් ඉදිරිපත් කරන ලෙසත් ඉල්ලා සිටින අතර, එම වාර්තා දෙකම සංවාදයක් තුළ සාකච්ඡා කළ යුතුය.’