නුසුදුස්සන්ටත් සමෘද්ධිය ලැබෙන බවට පැමිණිලි : සමෘද්ධිලාභීන් ගැන විගණනයක් ?

(හසරිඳු රාජපක්ෂ)

ආර්ථිකව ශත්තිමත් පුද්ගලයන් ද සමෘද්ධි දීමනා ලබන බවට පැමිණිලි රාශියක් ලැබෙන බැවින් වර්තමාන සමෘද්ධිලාභීන් පිළිබඳ විගණනයක් කළ යුතු බවට ආර්ථික පුනර්ජීවනය සහ දරිද්‍රතාවය තුරන් කිරීම සඳහා වන ජනාධිපති කාර්ය සාධක බලකායේ ජාතික සම්බන්ධීකරණ ජීවනෝපාය අනු කමිටුව සාකච්ඡා කර තිබේ.

දිගින් දිගටම සමෘද්ධි සහනාධාර ලබා දෙමින් එම වැඩසටහන ආරම්භ කළ මුඛ්‍ය පරමාර්ථය වන දිළිඳු ජනතාව ආර්ථික වශයෙන් සවිබල ගැන්වීමේ  අරමුණෙන් සමෘද්ධි ව්‍යාපාරය මේ වනවිට ඈත් වී ඇති බව මෙම කමිටුවේ සභාපති කම්කරු අමාත්‍ය නිමල් සිරිපාල ද සිල්වා මහතා ප්‍රකාශ කර ඇත. එම නිසා සමෘද්ධි ව්‍යාපාරය අපේක්ෂා කළ අවසාන ප්‍රතිඵලය මේ දක්වා සමෘද්ධි ව්‍යාපාරයට ළඟා කර ගැනීමට නොහැකි වී ඇති බවද හෙතෙම පෙන්වා දී ඇති අතර තමන්ගේ වසමේ සමෘද්ධි ප්‍රතිලාභීන් ආර්ථික වශයෙන් සවිබල ගැන්වීමට නොහැකි නම් එම සමෘද්ධි නිලධාරීන් පිළිබඳව තීරණයක් ගත යුතු බවද හෙතෙම පවසා තිබේ.

සමෘද්ධි හා දිළිඳු පවුල් ලක්ෂ දෙකක් ආර්ථික වශයෙන් සවිබල ගැන්වීම සඳහා වත්මන් රජයේ අයවැය මගින් රුපියල් මිලියන 10,000 ක් වෙන්කර තිබේ. එම යෝජනා ඉතා ඉක්මණින් ක්‍රියාත්මක කරන ලෙසද මෙහිදී සමෘද්ධි නිලධාරීන්ට දැනුම් දී ඇත.

සමෘද්ධි දෙපාර්තමේන්තුවේ දැක්ම අනුව 2030 වන විට දුගී බවෙන් තොර සවිබල ගැන්වු සමෘද්ධිමත් ශ්‍රී ලංකාවක් බිහිකිරීම එහි අරමුණ බව සඳහන් කර තිබේ. මේ වන විට සමෘද්ධි සහනාධාර ලබන පවුල් 1765597 ක් ඇති අතර අලුතින් සමෘද්ධි ආධාර ලබාදිමට ද රජයේ අවධානය යොමුව තිබේ.

ආර්ථික පුනර්ජීවනය සහ දරිද්‍රතාවය තුරන් කිරීම සඳහා වන ජනාධිපති කාර්ය සාධක බලකායේ ජාතික සම්බන්ධීකරණ ජීවනෝපාය අනු කමිටුව එහි සභාපති කම්කරු අමාත්‍ය නිමල් සිරිපාල ද සිල්වා මහතාගේ සභාපතිත්වයෙන් ඊයේ(17) පළමු වරට රැස් විය.

නාමල් රාජපක්ෂ, ප්‍රසන්න රණතුංග යන අමාත්‍යවරු සහ අජිත් නිවාඩ් කබ්රාල්, ඩී.වී. චානක, සීතා අරඹේපොල යන රාජ්‍ය අමාත්‍යවරු මෙම අවස්ථාවට එක් වූහ.

ජනතාවගේ ජීවනෝපාය සංවර්ධනය සඳහා 2021 අයවැය යෝජනාවලින් ඉදිරිපත් කර ඇති නව ව්‍යාපෘති ක්‍රියාත්මක කිරීමට ඒ ඒ අමාත්‍යංශය කටයුතු කරන ආකාරය සම්බන්ධයෙන් සොයාබලම්න් එම කටයුතු සම්බන්ධීකරණ කිරීම සහ ගම සමග පිළිසඳරක් වැඩසටහනේ දී ජනතාව විසින් ඉදිරිපත් කරන ගැටළුවලට විසඳුම් ලබාදීමත් මෙම අනු කමිටුවේ ප්‍රධාන කාර්යභාරය වී ඇත.