කොරෝනා මර්දනය වෙලා ? : පීසීආර් අඩු කරලා – සෞඛ්‍ය දත්ත අනාවරණය කරන ඇත්ත !

(නිලූක සඳුන් පද්මසිරි)

කොරෝනා ආසාදිතයින් හඳුනාගැනීම සඳහා මෙරට සිදු කරනු ලබන පීසීආර් සහ රැපිඩ් ඇන්ටිජන් පරීක්ෂණ ගණන අති විශාල ලෙස අඩු කර ඇතැයි සෞඛ්‍ය ප්‍රවර්ධන කාර්යංශයේ දත්ත පෙන්වා දෙයි.

මේ දිනවල කොරෝනා ආසාදිතයින් සංඛ්‍යාව බෙහෙවින් අඩුවී ඇති අතර ඊට මෙම පීසීආර් පරීක්ෂණ සංඛ්‍යාව අඩුවීමද බලපා ඇති බව සෞඛ්‍ය ආරංචිමාර්ගවලින් පැවසේ.

ඊයේ(07) දින සිදුකර ඇති පීසීආර් පරීක්ෂණ සංඛ්‍යාව 6403ක් බවත් ඇන්ටිජන් පරීක්ෂණ සංඛ්‍යාව 3897ක් බවත් එම කාර්යංශය සඳහන් කරයි. ඊයේ කර ඇති මුළු පරීක්ෂණ සංඛ්‍යාව 10300කි.

පෙරේදා (06) දින සිදුකර ඇති පීසීආර් පරීක්ෂණ සංඛ්‍යාව 5631ක් බවත් ඇන්ටිජන් පරීක්ෂණ සංඛ්‍යාව 2433ක් බවත් එම කාර්යංශය සඳහන් කරයි. ඒ අනුව එදින සිදුකර ඇති පරීක්ෂණ සංඛ්‍යාව 8,064කි.

ජූලි 5 වැනිදා සිදුකරන ලද පීසීආර් පරීක්ෂණ ගණන 15780 ක් වන අතර ඇන්ටිජන් පරීක්ෂණ සංඛ්‍යාව 2753කි. ජූලි 04 වැනිදා සිදුකරන ලද පීසීආර් පරීක්ෂණ ගණන 9279ක් වන අතර එදින සිදු කළ ඇන්ටිජන් පරීක්ෂණ ගණන 1992කි.

දිනෙන් දින සිදුකෙරන පීසීආර් පරීක්ෂණ සංඛ්‍යාව අඩු වෙමින් පවතින බව සෞඛ්‍ය අංශ ද පවසයි.

චක්‍රලේඛ – වර්ජන හේතුවක්

මේ සම්බන්ධයෙන් කළ විමසීමකදී මහජන සෞඛ්‍ය පරීක්ෂකවරුන්ගේ සංගමයේ ලේකම් මහේන්ද්‍ර බාලසූරිය මහතා පැවසූවේ වැඩ වර්ජන නිසාත් සෞඛ්‍ය අමාත්‍යාංශයේ චක්‍රලේඛයක් නිසාත් මෙම පීසීආර් පරීක්ෂණ සිදුකරන සංඛ්‍යාව අඩු වී ඇති බවත් සෞඛ්‍ය වැඩ වර්ජනය නිසාත් පීසීආර් පරීක්ෂණ සංඛ්‍යාව අඩුවී ඇති බවත්ය.

“ඔව් ඉතින් පීසීආර් කරන සංඛ්‍යාව අඩු වෙලා තියෙනවා. පහුගිය ටිකේ ස්ට්‍රයික් එකක් තිබුණනේ. ඒකත් හේතුවක්. ඒ වගේම සෞඛ්‍ය අමාත්‍යාංශයෙන් චක්‍රලේඛයක් ගහලා තියෙනවා පළමු ආශ්‍රිතයින්ගේ පීසීආර් දෙකක් කරන්න එපා කියලා. ඉස්සර පළමු ආශ්‍රිතයින් විදියට ගෙවල්වල නිරෝධායනය කරපු ඒවාගේ කරන්න එපා කියලා දැනුම් දීලා තියෙනවා. ඒක හින්දා දැනට පීසීආර් කරන ගණන අඩුයි.” යැයි ඔහු සඳහන් කළේය.

පීසීආර් අඩුකිරීම වැරදියි

මේ අවස්ථාවේ පීසීආර් පරීක්ෂණ අඩු කිරීම වැරදි බව රජයේ වෛද්‍ය නිලධාරීන්ගේ සංගමයේ මධ්‍යම කාරක සභික රුවන් ජයසූරිය මහතා මේ පිළිබඳ කළ විමසීමකදී පැවසීය.

පීසීආර් කිරීම අඩුකරලා තියෙනවාද?

පීසීආර් අඩුවීම කියන එකනම් එහෙම කියන්න බෑ. පීසීආර්වල පොසිටිව් රේට් එකත් අඩුවෙලා තියෙනවා. මීට සති දෙකකට විතර කළින් පොසිටිව් රේ⁣ට් එක සියයට 15ක් තිබ්බ එක සියයට 10ට වගේ අඩුවෙලා තියෙනවා. ඒකෙන් පේන්නේ යම් පාලනයක් තියෙනවා කියන එක. නමුත් මේ වෙලාවේ පීසීආර් පරීක්ෂණ අඩු කරන්න යන එක වැරදියි..නමුත් අපිට ඒක කියන්න බෑ පීසීආර් පරීක්ෂණ අඩුවෙලා කියලා. මොකද ප්‍රදේශයේ වෛරසයට නිරාවරණය වුණ අය බලලා සෞඛ්‍ය වෛද්‍ය නිලධාරී කාර්යාලය තමයි තීරණය කරන්නේ එතන කොටසක්. අපි තොරතුරු එක්ක බලන්න ඕන ඒක.

චක්‍රලේඛයක් ගහලා තියෙනවද පළමු පෙළ ආශ්‍රිතයින්ගේ පීසීආර් කරන්න එපා කියලා..?

නෑ. මම දන්න විදියට නම් නෑ. එහෙම කරන්නත් බෑනේ. ඒක තීරණය කරන්න වෙන්නේ තාක්ෂණික කමිටුවලින් ඒ ඒ ප්‍රදේශවල..

ලැබෙන නිදර්ශකත් අඩුවෙලා 

වෛද්‍ය රසායනාගාර විද්‍යාඥ වෘත්තීයවේදීන්ගේ විද්වත් සංගමයේ සභාපති රවී කුමුදේශ් මහතා පැවසුවේ මේ දිනවල රසායානාගාරවලට ලැබෙන නිදර්ශක බොහෝ සෙයින් අඩුවී ඇතිවී බවයි.

මේ දවස්වල පීසීආර් පරීක්ෂණ සංඛ්‍යාව අඩුවෙලා තියෙනවා…?

ඔව් මේ දවස්වල පීසීආර් පරීක්ෂණ අඩුවෙලා තියෙනවා.

ඒකට හේතුව…?

පීසීආර් මේ දවස්වල විශාල වශයෙන් අඩුවීමට හේතුව වෛද්‍ය රසායනාගාර වෘත්තීයවේදීන්ගේ වැඩ වර්ජනයක් තිබ්බා. ඒක ⁣එක හේතුවක්. ඒක දැන් යථා තත්ත්වයට පත්වෙමින් තිබෙනවා. අනික පීසීආර් නිදර්ශක ලැබෙන ප්‍රමාණය අඩුවෙලා තියෙනවා. අපි දන්නේ නෑ ඒ ඇයි කියලා. අපට ලැබෙන නිදර්ශක අපි කරනවා. වැඩ වර්ජනය අස්සේ එවපු ටික අපි මේ වෙද්දි කරලා ඉවරයි.

අඩුකරලා නෙමෙයි අඩුවෙලා

මේ සම්බන්ධයෙන් කළ විමසීමකදී සෞඛ්‍ය අමාත්‍යාංශයේ මාධ්‍ය ප්‍රකාශක නියෝජ්‍ය සෞඛ්‍ය සේවා අධ්‍යක්ෂ ජනරාල් හේමන්ත හේරත් මහතා පැවසුවේ මේ දින වල පැවති සෞඛ්‍ය අංශවල වෘත්තීය ක්‍රියාමාර්ග නිසා පීසීආර් පරීක්ෂණ සංඛ්‍යාව හොඳින්ම අඩු වී ඇති බවයි.

පීසීආර් අඩු කරලා තියෙනවාද?

පීසිආර් පරීක්ෂණ අඩුකරලා නෙමෙයි අඩු වෙලා.

පැහැදිලි කළොත්…?

ඒ කියන්නේ මේ වෘත්තීය සමිති ක්‍රියාමාර්ග එක්ක සාම්පල් ගැනීමත් අඩුවුණා. රසායනාගාර පරීක්ෂණත් අඩුවුණා. කරපුවා ටික තොරතුරු ඇතුළත් කරලා අපට වාර්තා කරන්න ඕනේනේ. ඒකත් අඩුවුණා. එතකොට ⁣ඒ සංඛ්‍යා හොඳටම අඩුවුණා. ඒත් අද ඒවා පිකප් වෙලා සාමාන්‍ය තත්ත්වයට පත්වෙයි කියලා අපි හිතනවා..

පළමු පෙළ ආශ්‍රිතයින්ගේ පීසීආර් පරීක්ෂණ කරන්න එපා කියලා චක්‍රලේඛයක් ගහලා තියෙනවාද ?

එපා කියලා නෙමෙයි.. අපිට පීසීආර් කරන්න අවශ්‍ය නම් ඒක කරන්න පුළුවන්. ඇන්ටිජන් කරලත් අපිට එයාලව නිදහස් කරන්න පුළුවන් දවස් 14 ගියාට පස්සේ.

පරීක්ෂණ කරන්න එපා කියලා නෙමෙයි ඒ කියන්නේ..?

එපා කියලා නෙමෙයි කියන්නේ. දැන් මේ තත්ත්වය එක්ක මිනිස්සු අපහසුතාවට පත්වෙනවානේ මේ රසායනාගාර පරීක්ෂණ වෙලාවට කරගන්න බැරි වුණොත් එහෙම. නැත්නම් කළින් තිබ්බේ පීසීආර් කරන්නැතිව නිදහස් කරන්නේ නෑ කියලා. එතකොට නිරෝධායනය කරන එක නොකඩවා කරගෙන යන්න වෙනවා ඒ සේරම කරලා ඉවර වෙනකම්. ඇන්ටිජන් ටෙස්ට් එක කරලා ඒක නෙගටිව් නම් අපි දවස් 14න් අපි ඒ රෝගීන් නිදහස් කරනවා.