රිෂාඩ් පාර්ලිමේන්තුවට ගේන්න එපා – ඇමැති : ගෙනාවට කමක් නෑ – නීතිපති 

මාස තුනක රැඳවුම් නියෝග මත අපරාධ පරීක්ෂණ දෙපාර්තමේන්තුවේ රඳවා තබාගෙන සිටින පාර්ලිමේන්තු මන්ත්‍රී රිෂාඩ් බදියුදීන් මහතා පාර්ලිමේන්තුවට ඉදිරිපත් නොකරන ලෙස නීතිය හා සාමය අමාත්‍ය සරත් වීරසේකර අද (05) කතානායකවරයාගෙන් ඉල්ලා සිටියේය.

ඔහු මෙම ඉල්ලීම කළේ රිෂාඩ් බදියුදීන් පාර්ලිමේන්තු රැස්වීමට ඉදිරිපත් නොකිරීම ගැන විපක්ෂනායක සජිත් ප්‍රේමදාස කතානායකවරයාගෙන් කළ විමසීමක දීය.

නීතිය හා සාමය අමාත්‍යවරයා මෙම ප්‍රකාශ කරන්නේ රිෂාඩ් බදියුදීන් මහතා පාර්ලිමේන්තුවට ඉදිරිපත් කිරීම සම්බන්ධයෙන් නීතිමය ගැටලුවක් නොමැති බව නීතිපතිවරයා දැනුම් දී තිබිය දීය.

රිෂාඩ් බදියුදීන් මහතා පාර්ලිමේන්තුවට නොගෙනීම ගැන ඇතිවූ සංවාදය කෙටියෙන් පහත දැක්වේ.

සජිත් ප්‍රේමදාස – රිෂාඩ් බදියුදීන් මන්ත්‍රීවරයා මෙම සභාවට කැඳවිය යුතුයි. මම ඔබෙන් නිහතමානීව ඉල්ලනවා එය සිදුකරන ලෙස.

සරත් වීරසේකර – ගරු කථානායක තුමනි, විපක්ෂනායකවරයා කිව්වා රිෂාඩ් බදියුදීන් මන්ත්‍රීවරයා පාර්ලිමේන්තුවට ගේන්න කියලා.  ඒ වගේ ත්‍රස්තවාදය වැළැක්වීමේ පනත යටතේ රැඳවුම් නියෝග යටතේ සිටින කිසිම මන්ත්‍රීවරයෙක් විමර්ශන කටයුතු ඉවර වෙනකම් පාර්ලිමේන්තුවට කැඳවන්න එපා කියලා ඔබතුමාගෙන් කාරුණිකව ඉල්ලා සිටිනවා. මොකද විමර්ශන කටයුතු කියන්නේ ජාතික ආරක්ෂාව පිළිබඳ කටයුතු. එතකොට ඒ සම්බන්ධයෙන් තොරතුරු පාර්ලිමේන්තු වරප්‍රසාද යටතේ පාර්ලිමේන්තුවට ඇවිත්  හෙළිදරව් කරොත් එතැනදී ඉදිරියේදී අත්අඩංගුවට ගන්න ඉන්න අයට සමහර විට රටින් පැන ගන්න පුළුවන්. එහෙම නැත්නම් ඒ ප්‍රශ්නවලට සූදානම් වෙන්න පුළුවන්.. ඒ නිසා ජාතික ආරක්ෂාව යන ඉතාම වැදගත් මාතෘකාව නිසා ත්‍රස්තවාදය වැළැක්වීමේ පනත යටතේ රැඳවුම් නියෝග යටතේ  ඉන්න කිසිම පාර්ලිමේන්තු මන්ත්‍රීවරයකුට ඒ විමර්ශන කටයුතු අවසන් වන තෙක් පාර්ලිමේන්තුවට ගෙන ඒමට අවසර නොදෙන ලෙසට මම ඔබතුමාගෙන් කාරුණිකව ඉල්ලා සිටිනවා.

සජිත් ප්‍රේමදාස – මම කනගාටු වෙනවා ගරු කථානායක තුමා. මේ කාරණාව අපි පක්ෂ නායක රැස්වීමේදී සාකච්ඡා කරනකොට ජාතික ආරක්ෂාව පිළිබඳ කාරණාව ඔබතුමා සඳහන් කළෙත් නෑ. දිනේෂ් ගුණවර්ධන මැතිතුමා සඳහන් කළෙත් නෑ. ආණ්ඩු පාර්ශ්වයේ කිසිම කෙනෙක් සඳහන් කරේ නෑ. එතුමන්ලා කිව්වා ඔබතුමාටත් මතක ඇති…රිෂාඩ් බදියුදීන් මැතිතුමා කොවිඩ් ආශ්‍රිතයෙක් සමග… ඔන්න ඔහොම කතාවක් කිව්වා. අපිටත් පැහැදිලි වුණේ නෑ ගරු කථානායකතුමනි.. ඒ නිසා තමයි මම මේ අවස්ථාවේ නිල වශයෙන් ඇහුවේ.. රිෂාඩ් බදියුදීන් මැතිතුමා පාර්ලිමේන්තුවට කැඳවන්නට ඕනේ. ඒක  එතුමාගේ අයිතිය. පාර්ලිමේන්තු ඔබ මන්ත්‍රීවරුන්ගේ අයිතිය ආරක්ෂා කරන්නට ඕනේ. ඒ කාරණාව පිළිබද මොකද්ද ඔබතුමාගේ තීන්දුව.? දැන් ඔබතුමා කියන්නේ මේ ආරක්ෂක ඇමතිතුමා කියන කතාවමද?

කතානායක – මට නිල වශයෙන් දන්වලා තියෙන්නේ කොවිඩ් ප්‍රශ්නය පිළිබදව තියෙන ගැටලුව තමයි.   අද වෙනකොට ඒක ඊයෙට වඩා නරක තැනක තියෙනවා කියලා තමයි මට දැන් දැනගන්න ලැබුණේ. ගැටලු දෙකක් තියෙනවා මෙතන. ඒ ගැටලු දෙක ගැන මීට වඩා දීර්ඝ සාකච්ඡාවක් කරලා තින්දුවක් ගනිමු.

ලක්ෂ්මන් කිරිඇල්ල – ගරු කථානායකතුමනි…රිෂාඩ් මන්ත්‍රීතුමා පාර්ලිමේන්තුවට නොගෙනීම සම්බන්ධයෙන් කතා තුනක් පැය විසි හතර තුළ. ඊයේ එතුමාගේ පවුලේ අය කතා කරාම කිව්වා ඔබතුමාගේ අත්සන නෑ,  ඔබතුමාගේ අත්සන නැතිව ගේන්න බෑ කියලා. පක්ෂ නායක රැස්වීමට ආවම ඔබතුමා මේ කොවිඩ් කතාවක් කිව්වා. ආරක්ෂක ඇමති දැන් ත්‍රස්තවාදය වැළැක්වීමේ පනත ගැන කතා කරනවා. කතා තුනක්…මේවා ඔක්කොම ගොතපුවා.

ජනාධිපති නීතීඥ ඒම් ඒ සුමන්තිරන් – පළමු වතාවට ගරු ඇමතිතුමා මේ සභාවට කිව්වා ත්‍රස්තවාදය වැළැක්වීමේ පනත යටතේ රඳවාගෙන සිටින කෙනෙකුට පාර්ලිමේන්තුවට එන්න බෑ කියලා. මේක මේ සභාවේ ඉතිහාසයේ කවදාවත් සිද්ධ වෙච්ච දෙයක් නෙමෙයි. කිසිම කෙනෙක් අධිකරණය මගින් වරදකරු බවට තීන්දු කරන තෙක් පාර්ලිමේන්තු අසුන අහිමි වෙලා නෑ. අමාත්‍යවරයා කියන විදියට මේක නීතියක් නම් ත්‍රස්තවාදය වැළැක්වීමේ පනත යටතේ සැකපිට මාස තුනක් රදවා සිටියොත් කෙනෙක්ගේ පාර්ලිමේන්තු මන්ත්‍රී ධුරය අහිමි වෙන්න පුළුවන්… ඒක නීතිය වෙන්න බෑ.

චමින්ද විජේසිරි – සුමන්තිරන් මන්ත්‍රීතුමා කියනවා වගේ පවතින නීතිය තුළ මේ නීතිය නෑ. දැන් එහෙම ඒ පනත යටතේ අත්අඩංගුවට ගත යුතු ප්‍රකාශ කරපු අය එළියේ ඉන්නවා. හැබැයි ඒ අය ගන්නේ නෑ. ත්‍රස්තවාදය පනත එක පැත්තකින් පාර්ලිමේන්තු සම්ප්‍රදාය සම්පූර්ණයෙන් කඩා දාලා විපක්ෂය මර්දනයට… හරීන් ප්‍රනාන්දු මන්ත්‍රීතුමා ගන්න යන්නේ ත්‍රස්තවාදී පනතින්.. එතුමා මාස තුනක් පාර්ලිමේන්තු ආවේ නැත්නම් මන්ත්‍රී ධුරය අහෝසි වෙනවා. ගරු කථානායක තුමනි මේ අවභාවිත කරන්න යන්නේ පාර්ලිමේන්තුවේ වරප්‍රසාද…පාර්ලිමේන්තු නීතී..ඒ නිසා ගරු කථානායක තුමත් අපහසුතාවට පත්වෙනවා. ඒ නිසා එහෙම කරන්න දෙන්න එපා.. අපිට මේ ත්‍රස්තවාදීන් පිළිබද ප්‍රශ්නයක් නෑ.. ත්‍රස්තවාදී ප්‍රකාශ කරන ගොඩක් අය ඉන්නවා…

සරත් ෆොන්සේකා – ගරු ඇමතිතුමා ඔබතුමාට අවධාරණය කරන්න රිෂාඩ් බදියුදින් කියන්නේ මහජන නියෝජිතයෙක්…මහජන නියෝජිතයන්ට ගරුත්වයක් තියෙනවා. ඒගොල්ලෝ මහජනයව නියෝජනය කරනවා මොන පක්ෂයේ හිටියත්..විපක්ෂයේ හිටියත්..සීඅයිඩී එකේ නිලධාරීන් දෙන්නෙකුට තුන්දෙනකුට මහජන නිලධාරියෙක්ව අල්ලලා ඊටපස්සේ රැඳවුම් නියෝගයක් ගත්තම මහජන නියෝජිතයා ගෙදර යනවානම් ඔබතුමාගේ නීතියෙන් රටට වැඩක් වෙන් නෑ. ඒ ීතිය සාධාරණ නෑ. කොයි පැත්තේ හිටියත්  සාධාරණ නෑ. ඒක ඔබතුමා තේරුම් ගන්න.

මුජිබර් රහුමාන් – ගරු කථානායක තුමනි. දැන් රිෂාඩ් බදියුදීන් මන්ත්‍රීතුමාව පාර්ලිමේන්තුවට නොගෙන ඒම සම්බන්ධ සදුදා 3ට එතුමාගේ පීසීආර් එකක් කරා එතුමාට කොවිඩ්-19 තියෙනවද බලන්න. නමුත් ඒ පීසීආර් වාර්තාව මේ වෙනකම් දීලා නෑ සදුදා 3ට ගත්ත වාර්තාව…තව වෙනකම් ඒ වාර්තාව ලබාදීලත් නෑ. අනිත් එක එතුමා අර එන්නතත් ලබාගෙන තියෙනවා කොවිඩ්-19 විරුද්ධව..අනිත් එක විශේෂයෙන්ම අපේ ආරක්ෂක ඇමතිතුමා මේ කියපු දේ ගැන ඉතාම බරපතල ප්‍රකාශයක්. ඔබතුමා මේ පිළිබදව පාර්ලිමේන්තුවට ප්‍රකාශයක් කරන්න ඕන. පාර්ලිමේන්තු මන්ත්‍රීවරයකු රඳවාගෙන ඉදිද්දී ඇමතිතුමා මේ සභාවේ නැගිටලා කියනවානම් මම නියෝග දීලා තියෙනවා එයාව ගේන්න එපා කියලා.. එහෙම කොහොමද එහෙම බලයක් එතුමට ලැබුණේ. ඔබතුමා ඒ ගැන ප්‍රකාශයක් කරන්න.. ඒක ඉතාම බරපතල ප්‍රකාශයක්…

සරත් වීරසේකර – ගරු කථානායක තුමනි, මම ඔබතුමාගෙන් ඉල්ලීමක් කළා ත්‍රස්තවාදය වැළැක්වීමේ පනත යටතේ රැඳවුම් නියෝග මත සිටින කිසිම මන්ත්‍රීවරයකුට ඒ විමර්ශන කටයුතු අවසන් වන තෙක් පාර්ලිමේන්තුවට ගේන්න එපා කියලා.  මම ඉල්ලීමක් කළේ. මොකද ඔබතුමන්ලා නෙමෙයි මහජන ආරක්ෂාව පිළිබද වගකියන්නේ. මම. සරත් ෆොන්සේකා මන්ත්‍රීවරයා නෙමෙයි. සරත් ෆොන්සේකා මන්ත්‍රීවරයාට මහජන ආරක්ෂාව පිළිබද කිසිම තැකීමක් නැති වෙන්න පුළුවන්.. නමුත් මහජන ආරක්ෂාව පිළිබද වගකියන්නේ මම..ඒ නිසා මම ඔබතුමන්ගෙන් ඉල්ලා සිටිනවා..විමර්ශන කටයුතු ඉවර වෙන තෙක්.. මොකද සීඅයිඩී නිලධාරීන්ට ඕන ඕන විදියට මන්ත්‍රීවරු අත්අඩංගුවට ගන්නේ නෑ. ඔවුන් අත්අඩංගුවට ගන්නේ යම් හේතු තියෙනවානම් පමණයි. රැඳවුම් නියෝග මත රදවාගෙන සිටින්න හේතු තියෙනවානම් විතරයි අත්අඩංගුවට ගන්නේ. සුමන්තිරන් මන්ත්‍රීවරයා කියන විදියටවත් ෆොන්සේකා මන්ත්‍රීතුමා කියන විදියට අපි වැඩ කරන්නේ නෑ. මම ඔබතුමාගෙන් ඉල්ලා සිටිනවා කථානායක තුමනි  ගේන්න එපා කියලා.

ආචාර්ය හර්ෂ ද සිල්වා – මේ රටේ නීතිය තියෙන්නේ ව්‍යවස්ථාවේ. මේ ඇමති කෙනෙක්ට ව්‍යවස්ථාවට විරුද්ධව වැඩ කරන්න බෑ.

කථානායකවරයා – අපි ඒ ගැන සාකච්ඡා කරල තීරණයක් ගන්නවා.

ආචාර්ය හර්ෂ ද සිල්වා – ඒ නිසා ඇමතිතුමා තේරුම් ගන්න ඕන රටේ මූලික නීතිය හදන්නේ මෙතැන..මේ පාර්ලිමේන්තුවේ. එතුමට ඕනනම් ව්‍යවස්ථාව වෙනස් කරලා මේ නීති වෙනස් කරන්න පුළුවන්…එතුමට මෙතැන එහෙම කතා කරන්න අයිතියක් නෑ.

කථානායකවරයා – හරි ඒක ඔබතුමාගේ මතය..

එස් එම් මරික්කාර් – කථානායක තුමා දැන් පාස්කු ඉරිදා කොමිෂන් වාර්තාවෙන් රිෂාඩ් බදියුදීන් මන්ත්‍රීවරයා ගැන නිර්දේශ නිකුත් කරලා තියෙන්නේ අල්ලස් හෝ දූෂණ කොමිසමෙන් පරීක්ෂණයක් කරන්න කියලා.. එතුමා සම්බන්ධයෙන් ඒක කළානම් අපිට කිසි ප්‍රශ්නයක් නෑ. දැන් එතුමාව ත්‍රස්තවාදයට සම්බන්ධනම් එතුමට නඩු දාලා හිරේ දාන්න. මොකද පාස්කු බෝම්බකරුවන්ට මරණ දඩුවම දෙන්න ඕන. හැබැයි මන්ත්‍රීවරයෙක්ගේ අයිතිවාසිකම් මෙතුමට ඕන විදියට ඇමතිට ඕන විදියට කඩන්න දෙන්න බෑ.

කථානායකවරයා – හරි.බොහොම ස්තූතියි