කොරෝනා පුවත වාර්තා කළාට මට තර්ජනය කළා – මාධ්‍යවේදියාගෙන් පැමිණිල්ලක් : මං ඇහුවා විතරයි – කතරගම රථවාහන ස්ථානාධිපති

මේ සම්බන්ධයෙන් මාධ්‍යවේදී එම්.කේ.නන්දසේන මහතා මෙ‌සේ පැවසීය.
‘පසුගියදා කොළඹ පැවති නිදහස් දින උළෙලට කතරගම පොලිසියෙන් සහභාගි වූ රථවාහන අංශයේ ස්ථානාධිපතිවරයාට කොරෝනා ආසාදනය වී ඇති බව දැනගැනීමට ලැබුණා. ඔහුත් සමග තවත් නිලධාරීන් දෙදෙනකුත් නිරෝධායනයට යොමුකර ඇති බව දැනගත්තා. ඒ අනුව මා එම පුවත දිනපතා පුවත්පතකට වාර්තා කළා. එම පුවත පළවීමෙන් පසු 2021 පෙබරවාරි 10 දින දහවල් 12.13ට එම නිලධාරියා මට දුරකතනයෙන් කතා කර, ඇයි මේක පත්තරේ දැම්මේ. බලු වැඩ කරන්න එපා. මං සනීප වෙලා ආවම බලාගන්නම් කියලා මට තර්ජනය කළා. මේ අය ගිනිඅවි අතේ තියාගෙන රාජකාරි කරන පිරිස්. මාධ්‍යවේදියෙක් ලෙස මං කළේ මගේ රාජකාරිය. අද වන විට මාත්, මගේ දරුවන් හා බිරිඳත් දැඩි අපහසුතාවකින් ඉන්නේ මේ තර්ජනය කිරීම නිසා. මේ සම්බන්ධයෙන් මම කතරගම පොලිසියේ ස්ථානාධිපතිවරයාට, සහකාර පොලිස් අධිකාරිවරයාට, තංගල්ල කොට්ඨාස බාර ජ්‍යෙෂ්ඨ පොලිස් අධිකාරි රවීන්ද්‍ර අඹේපිටිය මහතාට දුරකතනයෙන් වගේම ලිඛිතවත් පැමිණිලි කළා. මේ සම්බන්ධයෙන් සාධාරණ පරීක්ෂණයක් සිදුකරයි කියලා මම බලාපොරොත්තු වෙනවා.’

කෙසේ වෙතත් මේ සම්බන්ධයෙන් අදාළ තර්ජනය කළ බවට චෝදනා එල්ල වී ඇති කතරගම පොලිසියේ රථවාහන අංශයේ ස්ථානාධිපතිවරයා විමසීමේදී ඔහු මෙසේ පැවසීය.

‘මම ඔහුට මරණ තර්ජනයක් කළේ නෑ. මං දුරකතනයෙන් කතා කරලා විමසීමක් කළා ඇයි මගෙන් අහන්නේ නැතුව මේ පුවත පළකළේ කියලා. ඒ ඇරෙන්න බැණ වැදීමක් කළේ නෑ’