භූමදානයට අවසර දෙනවා – අගමැති මහින්ද රාජපක්ෂ

(හසරිඳු රාජපක්ෂ)

කොවිඩ් 19 වෛරසය ආසාදිතව මිය යන පුද්ගලයන්ගේ සිරුරු භූමදානයට අවසර දෙන්නේදැයි සමගි ජනබලවේගයේ පාර්ලිමේන්තු මන්ත්‍රී එස්.එම්. මරික්කාර් මහතා ඇසූ ප්‍රශ්නයකට පිළිතුරු දෙමින් අග්‍රාමාත්‍ය මහින්ද රාජපක්ෂ මහතා අද (10) පාර්ලිමේන්තුවේදී පැවසූවේ භූමදානය සඳහා අවසර දෙන බවයි.

ජලය මගින් කෝවිඩ් පැතිරීමක් සිදු නොවන බවට ප්‍රාථමික සෞඛ්‍ය සේවා, වසංගත රෝග හා කොවිඩ් රෝග පාලන කටයුතු රාජ්‍ය අමාත්‍ය සුදර්ශනී ප්‍රනාන්දුපුල්ලේ මහත්මිය විසින් ඊයේ (09) පාර්ලිමේන්තුවේදී ප්‍රකාශ කළාය.

ඒ බව උපුටා දක්වමින් කෝවිඩ් සිරුරු භූමදානයට දැන් අවසර දෙන්නේදැයි මරික්කාර් මන්ත්‍රීවරයා අග්‍රමාත්‍යවරයාගෙන් විමසා සිටියේය.
එයට පිළිතුරු දෙමින් අග්‍රාමාත්‍යවරයා මේ බව සඳහන් කළේය.

එස් එම් මරික්කාර් – ගරු කථානායකතුමනි අපේ සුදර්ශනී ප්‍රනාන්දුපුල්ලේ ඇමතිතුමිය රෝහණ බණ්ඩාර මහතාට උත්තරයක් දුන්නා වතුරෙන් කොවිඩ් හැදෙන්නේ නෑ කියලා. එහෙනම් දැන්වත් අපි අහන්න කැමතියි කථානායකතුමාගෙන් මේ භූමදානය සඳහා අවසර දෙනවද කියලා.

කථානායකවරයා – ඒක රීති ප්‍රශ්නයක් නෙවෙයි. අනවශ්‍ය ප්‍රශ්නයක් අදිනවා

මහින්ද රාජපක්ෂ – ඔබතුමා අහපු ප්‍රශ්නයට, මට කියන්න තියෙන්නේ භූමදානය කරන්න ඉඩ දෙනවා.

විද්‍යාත්මක හේතු මත පදනම්ව කෝවිඩ් සිරුරු භූමදානයට අවසර ලබාදීම සම්බන්ධයෙන් අගමැතිවරයාට ස්තුතිවන්ත වන බවද මරික්කාර් මන්ත්‍රීවරයා සඳහන් කළේය.

කෝවිඩ් ආසාදනය වී මියගිය මුස්ලිම් ජාතිකයින්ගේ සිරුරු මේ වන විට අධි ශීතාගාර තුළ තැන්පත්කර ඇති බව සෞඛ්‍ය අමාත්‍යාංශය පසුගියදා නිවේදනය කළේය. කෝවිඩ් ආසාදනය වී මිය යන පුද්ගලයින්ගේ සිරුරු ආදාහනය සහ භූමදානය කිරීම සම්බන්ධයෙන් ශ්‍රී ලංකාව තුළ දැඩි කතාබහක් ඇතිව තිබිණි. මේ සම්බන්ධයෙන් තීරණයක් ලබාදීමට සෞඛ්‍ය අමාත්‍යාංශය මගින් විද්වත් කමිටුවක් පවා පත්කර තිබුණි.