COVID-19 தொற்றுக்குள்ளானோரை ஊடகங்கள் குற்றவாளிகளாக சித்தரிப்பது கண்டிக்கத்தக்கதாகும்- YJA

COVID-19 தொடர்பாக அறிக்கையிடும் சில ஊடகங்கள் நோய்த் தொற்றுக்குள்ளானவர்கள் மற்றும் நோய் தொற்றியிருக்கலாம் என சந்தேகிக்கப்படுவோரின் தனியுரிமை பாதிக்கப்படும் விதத்தில் ஊடக அறிக்கையிடல்கள் மேற்கொள்ளப்படுவதை இலங்கை இளம் ஊடகவியலாளர்கள் சங்கம் வன்மையாகக் கண்டித்துள்ளது.

COVID-19 தொடர்பான அறிக்கையிடல்களில், ஊடகங்களின் வகிபாகம் குறித்து இலங்கை இளம் ஊடகவியலாளர்கள் சங்கம் வெளியிட்டுள்ள ஊடக அறிக்கையிலேயே இவ்வாறு தெரிவிக்கப்பட்டுள்ளது.

அவ்வமைப்பு வெளியிட்டுள்ள அறிக்கையில் மேலும் தெரிவிக்கப்பட்டுள்ளதாவது,

ஊடகங்கள் தமது கடமைகளை உலகில் பொதுவாக ஏற்றுக்கொள்ளப்பட்ட ஊடக நெறிமுறைகள் மற்றும் இலங்கையில் நடைமுறைப்படுத்தப்படும் சட்ட ஏற்பாடுகளுக்குள்ளே இருந்து மேற்கொள்ள வேண்டும் என்பதே எமது நம்பிக்கையாகும்.

COVID-19 நோய்த் தொற்றுக்குள்ளானவர்கள் மற்றும் நோய் தொற்றியிருக்கலாம் என சந்தேகிக்கப்படுவோர் குற்றவாளிகள் என்ற எண்ணம் பொதுமக்களிடையே ஏற்படும் விதத்திலும் அவர்களது தனியுரிமை பாதிக்கப்படும் விதத்திலும் சில ஊடகங்கள் அறிக்கையிட்டு வருவதை கடந்த மார்ச் மாதம் முதல் அவதானித்து வருகின்றோம். இதற்கு முன்னர் மார்ச் மற்றும் ஏப்ரல் மாதங்களில் ஒரு இனத்தைச் சேர்ந்தவர்கள் மாத்திரம் கொரோனா நோயைப் பரப்பி வருவதாகவும் சில ஊடகங்கள் போலிச் செய்திகளைப் பரப்பியதோடு, அவை சமூகத்தில் பெரும் பேசுபொருளாகவும் மாறியது.

இம்முறை COVID-19 தொற்று தீவிரமடைந்ததும், ஆடைத் தொழிற்சாலை ஊழியர்களின் தனியுரிமை பாதிக்கப்படும் விதமாகவும் அவர்கள் மீது பொதுமக்களுக்கு வெறுப்பு ஏற்படும் விதமாகவும் சில ஊடகங்கள் அறிக்கையிட்டன. அதேபோன்று, நோய்த் தொற்றுக்குள்ளான மற்றும் தனிமைப்படுத்தப்பட்டோரின் வீடுகளையும், முகங்களையும் அவர்களுக்கு PCR பரிசோதனைகள் மேற்கொள்ளப்பட்ட விதத்தையும் சில ஊடகங்கள் அறிக்கையிட்டதை கடந்த சில தினங்களாக அவதானித்து வருகின்றோம். இவ்வாறான அறிக்கையிடல்கள் சிறந்த ஊடகக் கலாச்சாரமொன்றுக்கு எவ்விதத்திலும் பொருத்தமற்றதாகும். மேலும் இவை, ஊடக நெறிமுறைகளை மீறும் செயற்பாடுகளாகும்.

நோய்த் தொற்றுக்குள்ளானோரை குற்றவாளிகளாகவும் அவர்களது தனியுரிமை பாதிக்கப்படும் விதத்திலும் ஊடகங்கள் அறிக்கையிடுவதே, நோய்த் தொற்றுக்குள்ளானோர் சிகிச்சைகளுக்காக முன்வராமைக்குரிய காரணமென்றும் நாம் நம்புகின்றோம்.

COVID-19 காரணமாக பாதிக்கப்பட்டுள்ள மக்களுக்கு ஊடகங்களால் மேலும் அழுத்தங்கள் பிரயோகிக்கப்படுவதை சாதாரண விடயமாகக் கருத முடியாது. எனவே, இவ்வாறு ஊடக நெறிமுறைகளை மீறும் செயற்பாடுகளில் இருந்து தவிர்ந்துகொள்ளுமாறும், ஊடக நெறிமுறைகளுக்கு அமைவாக அறிக்கையிடல்களில் ஈடுபடுமாறும் ஊடகங்களிடம் நாம் வேண்டிக்கொள்கின்றோம்.

 

“மொனராகலை ஊடகவியலாளரைத் தாக்கியவர்களுக்கெதிராக சட்ட நடவடிக்கையெடுக்கப்பட வேண்டும்”

கும்புகன் ஓயாவில் சட்டவிரோதமாக மணல் அகழ்வு செய்த சம்பவத்தை அறிக்கையடச் சென்ற மொனராகலை தெரண தொலைக்காட்சி ஊடகவியலாளர் இந்துனில் விஜேநாயக்க மீது நடந்த குண்டர் தாக்குதலை சுதந்திர ஊடக இயக்கம் வன்மையாகக்  கண்டித்துள்ளது.

சுதந்திர ஊடக இயக்கம் இதுதொடர்பாக வெளியிட்டுள்ள ஊடக அறிக்கையில் மேலும் தெரிவித்துள்ளதாவது,

“எமக்கு கிடைத்துள்ள தகவலின்படி, கும்புகன் ஓயா பகுதியில் சட்டவிரோதமாக மணல் அகழ்வு சம்பவம் குறித்து அறிக்கையிடுவதற்காக ஊடகவியலாளர் இந்துனில் விஜேநாயக்க சம்பவ இடத்திற்கு சென்றுள்ளார். அந்த நேரத்தில் அவரது அறிக்கையிடலுக்கு குருக்கீடு செய்த ஒரு குழு அவரைத் தாக்கியுள்ளது. இதன் காரணமாக அவர் மொனராகல மருத்துவமனையில் அனுமதிக்கப்பட்டு சிகிச்சை பெற வேண்டிய நிலை ஏற்பட்டுள்ளது. சம்பவம் தொடர்பாக மொனராகலை போலீசில் புகார் அளிக்கப்பட்ட்டதைத் தொடர்ந்து,  விசாரணையை ஆரம்பித்த போலீசார் சந்தேகநபர் ஒருவரை கைது செய்துள்ளனர் என்று அறியவருகின்றது.

சமீப காலங்களில், நாட்டின் பல்வேறு பகுதிகளில் சட்டவிரோத மணல் அகழ்வு குறித்து ஊடகவியலாளர்கள் அறிக்கை இட்டுள்ளனர்; இந்த அறிக்கைகள் தமது விசாரணைகளுக்கு பெரும் உதவியாக இருந்தன என்று இலங்கை காவல்துறை செய்தித் தொடர்பாளர் அண்மையில் வெளியிட்ட அறிக்கையில் இருந்து ஊடகவியலாளர்களின் பங்கின் முக்கியத்துவம் ஒப்புக் கொள்ளப்படுகிறது. உள்நாட்டு சுற்றுச்சூழல் விதிமுறைகள் மற்றும் சர்வதேச உடன்படிக்கைகள் அடிப்படையில் நாட்டின் அரிய இயற்கை வளங்களை பாதுகாக்கும் பொறுப்பு இலங்கை அரசுக்கு உள்ளது.

இத்தகைய பின்னணியில், சுற்றுச்சூழல் தகவல்களை அறிக்கையிடும் ஊடகவியலாளர்கள் முந்தைய பல சந்தர்ப்பங்களில் சுற்றுச்சூழல் குற்றங்களில் ஈடுபட்டதாக சந்தேகிக்கப்படும் நபர்களால் துன்புறுத்தப்பட்டுள்ளனர். இதுபோன்ற சம்பவங்கள் தொடர்பாக சட்டம் முறையாக அமுல்படுத்தப்பட்டிருந்தால், ஊடகவியலாளர்கள் அடிக்கடி சுற்றுச்சூழல் குற்றவாளிகளின் தாக்குதல்களுக்கு ஆளாக வேண்டியதில்லை. எனவே, இந்த சம்பவம் குறித்து உடனடியாக ஒரு பக்கச்சார்பற்ற விசாரணையை நடத்தி, சந்தேக நபர்களின் அந்தஸ்த்தைப் பொருட்படுத்தாமல் சட்டத்தை அமல்படுத்துமாறு சுதந்திர ஊடக இயக்கம் அதிகாரிகளை கேட்டுக்கொள்கிறது.”

 

CID பயங்கரவாத அமைப்பாக குறிப்பிடும் ‘கட்டார் செரிட்டி’ இலங்கை தூதரகத்துடன் இணைந்து பணியாற்றியுள்ளது

 

 

குற்றப் புலனாய்வுத் திணைக்களத்தின் மூலம் பயங்கரவாத அமைப்பாக பெயர் குறிப்பிடப்படுகின்ற ‘கட்டார் செரிட்டி’ இலங்கை அரசாங்கத்துடன் நெருங்கிப் பணியாற்றுகின்ற அமைப்பொன்றாகும் என சட்டத்தரணி ஹிஜாஸ் ஹிஸ்புல்லாஹ் சார்பில் ஆஜரான சட்டத்தரணி கோட்டை நீதவான் நீதிமன்றத்துக்கு அறிவித்துள்ளார்.

கட்டார் செரிட்டி தொண்டு நிறுவனம் இலங்கை அரசாங்கத்துடனும் ஐக்கிய நாடுகள் சபை மற்றும் யுனிசெப் போன்ற சர்வதேச அமைப்புகளுடனும் நெருங்கிப் பணியாற்றியுள்ளதாகவும் அவர் நீதிமன்றத்தில் தெரிவித்துள்ளார்.

சட்டவிரோதமான அமைப்பான கட்டார் செரிட்டியில் இருந்து ஹிஜாஸ் ஹிஸ்புல்லாஹ் நடத்தி வரும் சேவ் த பேள்ஸ் நிறுவனம் நிதியுதவி பெற்றுள்ளதாக குற்றப் புலனாய்வுத் திணைக்களத்தின் விஷேட விசாரணைப் பிரிவுப் பொறுப்பதிகாரி நீதிமன்றத்தில் தெரிவித்த விடயத்துக்குப் பதிலளிக்கும் போதே, ஹிஜாஸ் சார்பில் ஆஜரான சட்டத்தரணிகள் மேற்படி தெளிவுபடுத்தியுள்ளனர்.

உயிர்த்தஞாயிறு தின தொடர்  தற்கொலை தாக்குதல்கள் குறித்த விசாரணைகளுக்காக கைது செய்யப்பட்டு சி.ஐ.டி.யில் தடுத்து வைக்கப்பட்டுள்ள சட்டத்தரணி ஹிஜாஸ் ஹிஸ்புல்லாஹ் தொடர்பிலான விசாரணைகள் நிறைவடைந்துள்ளன. இது குறித்த விசாரணைகளை கடந்த 17 ஆம் திகதி நிறைவு செய்து, விசாரணை கோவையை சட்ட மா அதிபருக்கு அனுப்பியுள்ளதாக  குற்றப் புலனாய்வுத் திணைக்களத்தின் விஷேட விசாரணைப் பிரிவு பொறுப்பதிகாரி பிரதான பெண் பொலிஸ் பரிசோதகர் தீபானி மெனிகே  (22) கோட்டை நீதிவான் நீதிமன்றுக்கு அறிவித்தார்.

கடந்த 2019 உயிர்த்த ஞாயிறு தினமான ஏப்ரல்  21 ஆம் திகதி இடம்பெற்ற தொடர் குண்டுத் தாக்குதல்கள் குறித்த விசாரணைகளில், சினமன் கிரான்ட்  ஹோட்டலில் இடம்பெற்ற சம்பவத்தில் தற்கொலைதரையாக செயற்பட்ட மொஹம்மட் இப்ராஹீம் இன்சாப் அஹமட் என்பவருடன் தொடர்புகளை கொண்டிருந்ததாக கூறி சிரேஷ்ட சட்டத்தரணி ஹிஜாஸ் ஹிஸ்புல்லாஹ் , தாக்குதலுக்கு உதவி ஒத்தாசை புரிந்த சந்தேகத்தில் பயங்கர்வாத தடை சட்டத்தின் கீழ் கைது செய்யப்ப்ட்டு தடுத்து வைக்கப்ப்ட்டுள்ளார்.

இந் நிலையில்,  அந்த சம்பவத்தை மையபப்டுத்திய நீதிவான் நீதிமன்ற விசாரணையின் கீழேயே ஹிஜாஸ் ஹிஸ்புல்லாஹ் தொடர்பில் மன்றுக்கு விடயங்கள் அறிவிக்கப்பட்டு வரும் நிலையில், நேற்றுமுன்தினம் அவ்வழக்கு கோட்டை நீதிவான் பிரியந்த லியனகே முன்னிலையில் விசாரணைக்கு வந்தது.

இதன்போது,  விசாரணையாளர்கள் சார்பில் பிரதான பெண் பொலிஸ் பரிசோதகர் தீபானி மெனிகே ஆஜரானதுடன், ஹிஜாஸ் ஹிஸ்புல்லாஹ் சார்பில் ஜனாதிபதி சட்டத்தரணி பர்மான் காசிம், ஹபீல் பாரிஸ், தனுஷன் கனேஷ்யோகன் உள்ளிட்ட சட்டத்தரணிகள் குழாம் ஆஜரானது.

இதன்போது ஏற்கனவே நீதிமன்ற உத்தரவுக்கு அமைய, ஹிஜாஸ் குறித்த விசாரணைகள் நிறைவடைந்துள்ளனவா என ஆராயப்பட்டது.

இதன்போது மன்றுக்கு மேலதிக விசாரணை அறிக்கையினை சமர்ப்பித்த சி.ஐ.டி.யின் விசாரணை அதிகாரி தீபானி மெனிகே,  ஹிஜாஸ் குறித்த விசாரணைகள் நிறைவடைந்துள்ளதாக கூறினார். அது குறித்த  கோவை சட்ட மா அதிபருக்கு அனுப்பப்பட்டுள்ளதாகவும், விசாரணைகளில் ஹிஜாஸ் ஹிஸ்புல்லாஹ் அடிப்படைவாத நடவடிக்கைகளுடன் தொடர்புபட்டுள்ளமை தொடர்பில் தகவல்கள் வெளிபப்டுத்தப்ப்ட்டுள்ளதாக அவர் கூறினார்.

இந் நிலையில் மேலதிக தகவல்களை அவர் முன்வைக்கும் போது,

‘ சி.ஐ.டி.யின் தடுப்பில் உள்ள சட்டத்தரணி ஹிஜாஸ் ஹிஸ்புல்லாஹ்வின் அறக்கட்டளை நிறுவனமான சேவ் த பேர்ள் எனும் அமைப்புக்கு கட்டிடம் ஒன்றினை அமைக்க கட்டார் அறக்கட்டளை 13 மில்லியன் ரூபாவை வழங்கியுள்ளது.
சட்ட விரோத  அமைப்பான இந்த அறக்கட்டளை, சேவ் த பேர்ள்  அமைப்புக்கு அளித்த நிதி, பயங்கரவாத நடவடிக்கைகளுக்கு பயன்படுத்தப்பட்டதா, அவ்வாறான நடவடிக்கைகளுக்காக வழங்கப்பட்ட நிதியா என நாம் கறுப்புப் பண சுத்திகரிப்பு சட்டத்தின் கீழ் விசாரணைகளை ஆரம்பித்துள்ளோம்.  ஹிஜாஸ் குறித்த விசாரணைகளை நிறைவு செய்தாலும், சினமன் கிராண்ட் ஹோட்டல் மீதான தாக்குதல்கள் குறித்த விசாரணைகள் நிறைவடையவில்லை. அது தொடர்பில் 4 சந்தேக நபர்கள் தடுத்து வைத்து விசாரிக்கப்பட்டு வருகின்றனர்.’ என  விசாரணை அதிகாரி தீபானி மெனிகே குறிப்பிட்டார்.

இதன்போது மன்ரில் ஆஜரான ஹிஜாஸ் ஹிஸ்புல்லாஹ்வின் சட்டத்தரனிகள், கட்டார் அறக்கட்டளை, சட்ட விரோத, பயங்கர்வாதத்துக்கு நிதியளிக்கும் அமைப்பு எனும் சி.ஐ.டி.யின் விளக்கத்தை மறுத்தனர். உலக அளவில் செயர்படும் குறித்த அறக்கட்டளையானது, சவூதி அரேபியாவில் மட்டுமே தடை செய்யப்பட்டுள்ள பட்டியலில் உள்ளடக்கப்பட்டுள்ளதாகவும், அது சவூதி – கட்டார் அரசியல் முறுகல் காரணமாக  இடம்பெற்றது எனவும்  ஹிஜாஸின் சட்டத்தரனி சுட்டிக்காட்டினார்.

அத்துடன் கொவிட் 19 காலப்பகுதியில் கூட, குறித்த அறக்கட்டளை  கட்டாரில் உள்ள இலங்கை தூதரகத்துடன் இணைந்து பணியாற்றியமையையும், ஐக்கிய நாடுகள் சபையின் நிறுவனங்களுடன் இணைந்து பணியாற்றுவதையும் நினைவு கூர்ந்த சட்டத்தரணி, ஹிஜாஸ் ஹிஸ்புல்லாஹ்வுக்கு எதிராக குற்றம் சுமத்த சான்றுகள் இல்லாத நிலையில், தற்போது புதிதாக இவ்வாறான வேறு வழிகள் ஊடான சான்றுகளை உருவாக்க முயல்வதாக அவர் குற்றம் சுமத்தினார்.

இந்நிலையில் ஏற்கனவே, நீதிமன்றம் ஊடாக சிறுவர் உளவியல் மருத்துவ நிபுணர் ஒருவருக்கு பகுப்பாய்வுக்கு அனுப்பட்டுள்ள, ஹிஜாஸ் ஹிஸ்புல்லாஹ் தொடர்புபட்டதாக கூறபப்டும் மத்ரஸாவில் இருந்து கைப்பற்றப்பட்ட ‘ நவரசம் ‘ எனும் புத்தகம் தொடர்பில் அறிக்கை இன்னும் கிடைக்கவில்லை என சி.ஐ.டி. மன்றுக்கு அறிவித்த நிலையில், அப்புத்தகத்தின் சிங்கள மொழி பெயர்ப்புப் பிரதி ஒன்றினை மன்றுக்கும் அளிக்குமாறு நீதிவான் உத்தரவிட்டு, வழக்கை எதிர்வரும் ஒக்டோபர் 7 ஆம் திகதிக்கு ஒத்திவைத்தார்.

 

காணிகளுக்கு சட்ட ஆவணம் வழங்குதலைத் துரிதப்படுத்தும் வர்த்தமானி இரத்து- நிர்வாக ரீதியான பிழைகளே காரணமென்கிறார் அமைச்சின் செயலாளர்

ஆவணங்கள் இன்றி அரச காணிகளில் குடியிருப்போருக்கு சட்ட ரீதியான ஆவணம் வழங்குதலைத் துரிதப்படுத்த செப்டம்பர் மாதம் 10ஆம் திகதி வெளியிடப்பட்ட வர்த்தமானி அறிவித்தலில் காணப்பட்ட நிர்வாக ரீதியான பிழைகளின் காரணமாகவே இரத்து செய்யப்பட்டதாக காணி அமைச்சின் செயலாளர் ஆர்.ஏ.ஏ.கே.ரனவக தெரிவித்தார். 

2192/36ஆம் இலக்கம் மற்றும் 2020, செப்டம்பர் 10ஆம் திகதி வெளியிடப்பட்ட அதிவிசேட வர்த்தமானி அறிவித்தல் நேற்று (22) இரத்துச் செய்யப்பட்டமைக்கான காரணத்தை வினவியபோதே, அவர் இதனைத் தெரிவித்தார். 

முன்னைய வர்த்தமானி அறிவித்தலை இரத்துச் செய்த வர்த்தமானி அறிவித்தலில் “2192/36ஆம் இலக்கம் மற்றும் 2020, செப்டம்பர் 10ஆம் திகதி ‘ஆவணங்கள் எதுவுமின்றி அரச காணிகளை அபிவிருத்தி செய்து அல்லது குடியிருக்கும் மக்களுக்கு சட்ட ரீதியான ஆவணம் வழங்குதலை துரிதப்படுத்தல்’ எனும் தலைப்பில் வெளியிடப்பட்ட காணி ஆணையாளர் நாயகத்தின் அதிவிசேட வர்த்தமானி அறிவித்தல் இரத்துச் செய்யப்படுகின்றது” எனக் குறிப்பிடப்பட்டுள்ளது. 

ஆவணங்கள் எதுவுமின்றி அரச காணிகளை அபிவிருத்தி செய்து அல்லது குடியிருக்கும் மக்களுக்கு சட்ட ரீதியான ஆவணம் வழங்குதலை துரிதப்படுத்தும் திருத்தப்பட்ட வர்த்தமானி அறிவித்தல் வெளியிடப்படுவது தொடர்பில் எவ்வித தீர்மானமும் மேற்கொள்ளப்படவில்லை என்றும் காணி அமைச்சின் செயலாளர் ஆர்.ஏ.ஏ.கே.ரனவக தெரிவித்தார். 

மக்களுக்கு சட்ட ரீதியான ஆவணங்களை வழங்கப்படவுள்ளமை தொடர்பாக ஜனாதிபதி கோதாபய ராஜபக்ஷ கீழ்வரும் விடயங்களைத் தெரிவித்திருந்த நிலையிலேயே, குறித்த வர்த்தமானி அறிவித்தல் இரத்துச் செய்யப்பட்டுள்ளதும் குறிப்பிடத்தக்கது. 

‘மக்கள் பயன்படுத்தி வருகின்ற சிக்கலற்ற காணிகளுக்கு மூன்று மாத காலத்திற்குள் காணி உறுதிப்பத்திரங்களை வழங்குமாறு நான் அதிகாரிகளுக்கு பணிப்புரை விடுத்தேன்.

பல்வேறு மாவட்டங்களுக்கு விஜயம் மேற்கொண்டபோது காணி உறுதிப்பத்திரம் இல்லாமையே மக்கள் முன்வைத்த மிக முக்கிய பிரச்சினை.

பரம்பரையாக வாழ்ந்து வந்தாலும், பயிர்ச் செய்கைகளில் ஈடுபட்டிருந்தாலும் உறுதிப்பத்திரம் இல்லாமையினால் அவர்கள் பல்வேறு சிக்கல்களுக்கு உட்பட்டிருப்பதாக குறிப்பிட்டேன். பிரச்சினைகளை தீர்ப்பதற்கு நாட்டுக்கும் பொருளாதார கொள்கைக்கும் பொருத்தமான வகையில் அமைந்த காணி கொள்கை மறுசீரமைக்கப்பட வேண்டுமென்று குறிப்பிட்டேன்.

காணி உறுதிப்பத்திரம் இல்லாமையினால் மக்கள் பாரிய சிக்கல்களுக்கு உட்பட்டுள்ளதுடன், அபிவிருத்தியும் பாரிய பின்னடைவு கண்டுள்ளது. விவசாய பொருளாதார பொறிமுறை ஒன்றை கட்டியெழுப்பும்போது காணி பயன்பாட்டு கொள்கை மிக முக்கியம்.

குத்தகைக்கு விடப்பட்டுள்ள காணிகளை அபிவிருத்தி செய்ததன் பின்னர் காணி மறுசீரமைப்பு ஆணைக்குழு அல்லது காணி உரித்துடைய நிறுவனம் அல்லது வேறு தரப்பினருக்கு பொறுப்பளித்தல் விவசாயிகள் முகங்கொடுத்துள்ள மேலும் ஒரு சிக்கலாகும். அவ்வாறான நிலைமைகள் ஏற்படுவதற்கு இடமளிக்க வேண்டாமென்று அதிகாரிகளுக்கு பணிப்புரை விடுத்தேன்.’

கோப் குழு நடவடிக்கைகளை அறிக்கையிட ஊடகங்களுக்குப் பூட்டு

அரச பொறுப்பு முயற்சிகள் பற்றிய குழுவின் (கோப்) நடவடிக்கைகளை ஊடகங்கள் நேரடியாக அறிக்கையிடும் நடைமுறையை நிறுத்துவதற்கு அரசாங்கம் தீர்மானித்துள்ளதாக ஆளும் கட்சியின் பிரதம கொறடா ஜொன்ஸ்டன் பெர்னேண்டோ இன்று (23) பாராளுமன்றத்தில் தெரிவித்தார். 

கட்சித் தலைவர்கள் கூட்டத்திலேயே இவ்விடயம் தீர்மானிக்கப்பட்டதாகவும் அவர் தெரிவித்தார். 

கோப் குழு நடவடிக்கைகளின் வீடியோக்களை ஊடகங்கள், அவற்றின் அரசியல் நிகழ்ச்சி நிரலை ஊக்குவிக்கப் பயன்படுத்துவதாகவும் ஜொன்ஸ்டன் பெர்னேண்டோ குற்றம்சாட்டினார். 

அவர் மேலும் தெரிவித்ததாவது, 

‘முன்னாள் ஜனாதிபதி மற்றும் பிரதமர் ஆகியோரைத் தாக்கவே ஊடக நிறுவனங்கள் கோப் வீடியோக்களைப் பயன்படுத்தின. நாம் இதனைப் பயன்படுத்தி உங்கள் ஆட்சியில் இடம்பெற்ற ஊழல்களை வைத்து, ஊடகங்களில் தாக்கலாம். எனினும், இவ்விடயங்களில் ஒரு நியாயம் இருக்க வேண்டும். முன்னாள் அரச அதிகாரிகள் போன்றோரின் கௌரவத்தைக் காக்கும் விதமாகவே இந்தத் தீர்மானம் மேற்கொள்ளப்பட்டுள்ளது.

நாம் ஊடகங்களுக்கு போலியான தகவல்களை வழங்க மாட்டோம். ஏற்கனவே மேற்கொள்ளப்பட்டு வந்த நடைமுறையை பொதுமக்கள் மூன்றில் இரண்டு பெரும்பான்மையை வழங்கி, நிராகரித்துள்ளனர். பொதுமக்களால் நிராகரிக்கப்பட்ட அவ்வாறானவைகளை நாம் ஆரம்பிக்க மாட்டோம்.’

இவ்விடயத்துக்கு எதிர்ப்பை வெளியிட்டு, எதிர்க்கட்சிப் பாராளுமன்ற உறுப்பினர் நளின் பண்டார தெரிவித்ததாவது, 

‘நானும் கோப் குழுவின் உறுப்பினரே. இவ்விடயம் குறித்த தீர்மானம் அடுத்த வாரமே மேற்கொள்ளப்படவுள்ளதாக கோப் குழு கூட்டத்தில் தீர்மானிக்கப்பட்டது. கோப் குழுவின் தலைவர் சரித்த ஹேரத் தீர்மானிக்க வேண்டிய விடயத்தில், அவருக்கு அழுத்தம் கொடுக்கப்படுகின்றது’ 

இதற்குப் பதிலளித்த ஜோன்ஸ்டன் பெர்னேண்டோ தெரிவித்ததாவது,

‘சபா நாயகர் அவர்களே, நாம் இவ்விடயத்தை கட்சித் தலைவர்கள் கூட்டத்தில் தீர்மானித்தோம். அங்கு முன்னாள் அமைச்சர் லக்ஷ்மன் கிரியெல்லவும் இருந்தார். இந்த நளின் பண்டார உறுப்பினர் அதிலே இல்லை. அதுவே, அவருக்குத் தெரியாததற்கான காரணமாகும். அதுபோன்ற பதவியொன்றுக்கு வர இன்னும் காலமெடுக்கும்’

கோப் குழு ஊடகங்களுக்கு திறக்கப்பட்டதன் வரலாறு

2015ஆம் ஆண்டு நல்லாட்சி அரசாங்கம் பதவிக்கு வந்த பின்னர் கோப் குழுவுக்கான அணுகல் ஊடகங்களுக்கு வழங்கப்பட வேண்டும் என்ற ஆலோசனை மேலெழுந்தது. அந்த ஆலோசனையை அப்போதைய கோப் குழுவின் தலைவர் சுனில் ஹந்துநெட்டி முன்வைத்தார். 

மேலும், கோப் குழுவின் நடவடிக்கைகள் ஊடகங்களுக்கு திறக்கப்பட வேண்டும் என்று 2019ஆம் ஆண்டு ஆகஸ்ட் மாதம் 08ஆம் திகதி அப்போதைய சபாநாயகர் கரு ஜயசூரிய பாராளுமன்றத்தில் வலியுறுத்தினார். 

அதனடிப்படையில், 2019ஆம் ஆண்டு ஆகஸ்ட் மாதம் 09ஆம் திகதி பாராளுமன்ற குழு இலக்கம் 5இல் நடைபெற்ற கூட்டத்தைத் தொடர்ந்து கோப் குழுவின் நடவடிக்கைகளுக்கு ஊடகங்களுக்கு அணுகல் கிடைத்தது. 

கம்பித் தட்டுப்பாடு காரணமாக புதிய மின் இணைப்புகள் வழங்குவதில் தாமதம்: சிரமத்துக்குள்ளாகியுள்ள விண்ணப்பதாரிகள்

இலங்கையில் மின் இணைப்புகளை வழங்குவதற்காகப் பயன்படுத்தப்படும் கம்பிகளில் தட்டுப்பாடு ஏற்பட்டுள்ள காரணத்தால், புதிய மின் இணைப்புகளை வழங்குவது இடைநிறுத்தப்பட்டுள்ளதாக இலங்கை மின்சார சபை தெரிவித்துள்ளது. 

கம்பிகள் இல்லாத காரணத்தினால் புதிய மின் இணைப்புகளை வழங்க முடியாத நிலை காணப்படுவதாக இணைப்புக்களைப் பெற்றுக்கொள்ள மின்சார சபைக்குச் சென்ற பொதுமக்களுக்கு அறிவிக்கப்பட்டுள்ளது. 

வவுனியா உட்பட சில பிரதேசங்களில் இவ்வாறான பிரச்சினைகள் பதிவாகியுள்ளதோடு, கம்பிகள் கிடைத்த பின்னர் மின் இணைப்புக்களுக்காகப் பணம் செலுத்துமாறும் அறிவிக்கப்பட்டுள்ளது. 

புதிய மின் இணைப்புகளைப் பெற்றுக்கொள்ள ஏற்கனவே பணம் செலுத்திய மக்களுக்கும் இணைப்புகள் வழங்கப்படாத நிலை தொடர்கின்றது. 

இணைப்புக் கம்பிகள் கிடைத்ததும் மின் இணைப்பு வழங்கப்படும் என்று பொதுமக்களுக்கு அறிவிக்கப்பட்டுள்ளது. 

இதுதொடர்பாக இலங்கை மின்சார சபையின் ஊடகப் பேச்சாளர் சுலக்ஷன ஜயவர்தவிடம் வினவியபோது,
‘கம்பிகளின் தட்டுப்பாடு சில பிரதேசங்களில் பதிவாகியுள்ளன. எனினும், அந்த நிலைமைக்கான தீர்வுகள் தற்போதளவில் வழங்கப்பட்டுள்ளன. அதுதவிர வேறு எந்தப் பிரச்சினையும் இல்லை.’ என்றார். 

‘தொல்பொருள் அதிகாரிகளைத் தாக்கிய தேரருக்கு நீதிமன்றத்தில் ஆஜராக அறிவித்தல்’- பொலிஸ் ஊடகப் பணிப்பாளர்

தொல்பொருள் திணைக்கள அதிகாரிகளைத் தாக்கிய அம்பிட்டியே சுமனரதன தேரருக்கு அரச உத்தியோகத்தர்களின் கடமைகளுக்கு இடையூறு விளைவித்தமை தொடர்பாக மட்டக்களப்பு நீதவான் நீதிமன்றத்துக்கு அறிக்கை சமர்ப்பித்த பின்னர், எதிர்வரும் 30ஆம் திகதி நீதிமன்றத்தில் ஆஜராகி அல்லது பொலிஸில் முன்னிலையாகி வாக்குமூலம் அளிக்க அறிவித்தல் பிறப்பிக்கப்பட்டுள்ளதாக பொலிஸ் ஊடகப் பிரிவின் பணிப்பாளர் ஜாலிய சேனாரத்ன தெரிவித்தார். 

மட்டக்களப்பில் தொல்பொருள் அதிகாரிகளை அம்பிட்டியே சுமனரதன தேரர் தாக்கி, அவர்களது கடமைக்கு இடையூறு விளைவிக்கும் வீடியோ வெளியாகியிருந்த நிலையில், அதுகுறித்து பொலிஸாரால் முன்னெடுக்கப்பட்ட நடவடிக்கைகள் குறித்து கேட்டபோதே, பொலிஸ் ஊடகப் பிரிவின் பணிப்பாளர் இவ்வாறு தெரிவித்தார்.

 
குறித்த சம்பவம் தொடர்பாக பொலிஸ் ஊடகப் பிரிவின் பணிப்பாளர் மேலும் தெரிவித்ததாவது,    

‘தொல்பொருள் முக்கியத்துவமிக்க இடத்தில் கடமையில் ஈடுபட்டிருந்த தொல்பொருள் திணைக்கள அதிகாரிகளுக்கு தேரர் ஒருவர் உட்பட சிலர் இடையூறு விளைவித்தமை குறித்து கரடியணாறு பொலிஸ் நிலையத்தில் முறைப்பாடு செய்யப்பட்டிருந்தது. இதுதொடர்பாக கரடியணாறு பொலிஸார் விசாரணைகளை ஆரம்பித்துள்ளனர். இந்த தொல்பொருள் இடத்தில் அளவீட்டு நடவடிக்கைகளை மேற்கொள்ளச் சென்ற தொல்பொருள் திணைக்கள அதிகாரிகளுக்கு இடையூறு விளைவிக்கப்பட்டுள்ளது. 

இதுகுறித்து கரடியணாறு பொலிஸார் நீதிமன்றத்துக்கு அறிக்கை சமர்ப்பித்துள்ளனர். தாக்கப்பட்ட அதிகாரிகளின் மருத்துவ அறிக்கைகளைப் பெற நீதிமன்ற மருத்துவ அதிகாரி நடவடிக்கை எடுத்துள்ளார். 

அரச உத்தியோகத்தர்களின் கடமைகளுக்கு இடையூறு விளைவித்தமை தொடர்பாக மட்டக்களப்பு நீதவான் நீதிமன்றத்துக்கு அறிக்கை சமர்ப்பித்த பின்னர், எதிர்வரும் 30ஆம் திகதி நீதிமன்றத்தில் ஆஜராகி அல்லது பொலிஸில் முன்னிலையாகி வாக்குமூலம் அளிக்க அறிவித்தல் பிறப்பிக்கப்பட்டுள்ளது’ என்றார். 

தேரர் கைதுசெய்யப்பட வேண்டுமென்று பிரதேச மக்கள் இன்று(22) ஆர்ப்பாட்டமொன்றையும் மேற்கொண்டனர். 

மட்டக்களப்பு செங்கலடி, பன்குடாவெளி பகுதியில் தொல்பொருள் திணைக்களத்தால் அடையாளப்படுத்தப்பட்ட இடத்தைப் பார்வையிடச் சென்ற மட்டக்களப்பு மாவட்ட தொல்பொருள் அதிகாரிகளுக்கு அச்சுறுத்தல் விடுத்து, தாக்கும் வீடியோ வெளியாகியிருந்தது. 

அத்தோடு, தாக்கப்பட்ட மூன்று அதிகாரிகளையும் தேரர் தகர குடாரமொன்றில் சிறைப்பிடித்து, அரச அதிகாரிகள் அந்த இடத்திற்கு வரவேண்டுமென்று கோரிக்கை விடுத்துள்ளார். 

தொல்பொருள் முக்கியத்துவமிக்க இடத்தை அடையாளப்படுத்த ஒரு வாரத்துக்கு நடவடிக்கை எடுக்கப்படும் என்று திணைக்கள அதிகாரிகள் தேரருக்கு வாக்களித்த பின்னரே சிறைப்படுத்தப்பட்ட அதிகாரிகள் விடுவிக்கப்பட்டுள்ளனர்.

தாக்கப்பட்ட அதிகாரிகள் கரடியணாறு பொலிஸ் நிலையத்தில் முறைப்பாடு செய்துள்ளதோடு, கரடியணாறு மருத்துவமனையில் நேற்று(21) அனுமதிக்கப்பட்டுள்ளனர்.  

படம்: முகநூல் 

‘தேர்தலில் வாக்களிக்கச் சென்றதற்காகவும் எமது அரை நாள் சம்பளம் துண்டிக்கப்பட்டது’- 10ஆவது நாளாகவும் பணிபகிஷ்கரிப்பில் உடரெதல்ல தொழிலாளர்கள்

தேர்தலில் வாக்களிக்கச் சென்றதற்காக அரை நாள் சம்பளம் துண்டிக்கப்பட்டமை உட்பட சட்ட ரீதியாகவும் தொழில் ரீதியாகவும் தமக்குக் கிடைக்கவேண்டிய உரிமைகள் மறுக்கப்படுகின்றதாகத் தெரிவித்து நுவரெலியா நானுஓயா உடரெதல்ல தோட்டத் தொழிலாளர்கள் ஆர்ப்பாட்டத்தில் ஈடுபட்டு வருகின்றனர். 

களனிவெளி ப்லான்டேஷன்ஸ் நிர்வாகத்துக்குட்பட்ட நானுஓயா, உடரெதல்ல தோட்டத்தின் 275 தொழிலாளர்கள், தாம் எதிர்கொள்ளும் பிரச்சினைகளை முன்வைத்து கடந்த 12ஆம் திகதி ஆரம்பித்த பணிப் பகிஷ்கரிப்புப் போராட்டம் இன்று 10ஆவது நாளாகவும் தொடர்கின்றது.  

பணி பகிஷ்கரிப்பில் ஈடுபட்டுவரும் தோட்டத் தொழிலாளர்கள் கூறுவதாவது,

‘பாடசாலைக்குச் செல்லும் குழந்தைகளை பாதுகாப்பாக அழைத்துவர நியமிக்கப்பட்டுள்ள ‘கங்காணிகள்’ இருவர் நீக்கப்பட்டு குறைந்த சம்பளத்தில் வேறு இருவர் நியமிக்கப்பட்டுள்ளனர். இதனை ஏற்றுக்கொள்ள முடியாது. இவ்விடயத்தில் முன்பிருந்த நடைமுறை தொடர வேண்டும். 

8 மணிநேரம் வேலை செய்தாலும் அரைநாள் சம்பளமே வழங்கப்படுகின்றது. மழை நாட்களிலும் 18 கிலோ கிராம் கொழுந்து பறிக்க அழுத்தம் கொடுக்கப்படுகின்றது. அதற்கு ஒரு கிலோ கிராம் குறைந்தாலும் அரை நாள் சம்பளம் துண்டிக்கப்படுகின்றது. கொழுந்துகளை நிறுக்கும் தொழில்நுட்ப கருவி மூலம் குறைந்த நிறையே பதியப்படுகின்றது. இதனால், எமது உழைப்பு களவாடப்படுகின்றது. இதனையே நாம் எதிர்க்கின்றோம். 

அத்தோடு, கடந்த தேர்தலில் வாக்களிக்கச் சென்றதற்காகவும் அரை நாள் சம்பளம் துண்டிக்கப்பட்டுள்ளது. இதுகுறித்து முகாமையாளரிடம் கேட்டால், அரசாங்கத்திடம் கேட்டுப் பெற்றுக்கொள்ளுமாறு கூறுகின்றார். தேர்தல் தினத்துக்கான முழுநாள் சம்பளம் எமக்கு வழங்கப்பட வேண்டும். எமது உரிமைகளை தோட்ட முகாமையாளரே மறுத்து வருகின்றார்.’

இதனால், தோட்ட முகாமையாளருக்கு இடமாற்றம் வழங்கப்பட வேண்டுமென்றும், தமது கோரிக்கைகளுக்குத் தீர்வு கிடைக்கும் வரை போராட்டம் தொடருமென்றும் தொழிலாளர்கள் தெரிவிக்கின்றனர்.  
  
தொழிலாளர்கள் முன்னெடுத்துவரும் ஆர்ப்பாட்டம் குறித்து தோட்ட முகாமையாளரிடம் கேட்டபோது, 

‘இதுகுறித்து கருத்துத் தெரிவிக்கும் நிலையில் நான் இல்லை. பிரதான அலுவலகத்திலேயே நீங்கள் இதுகுறித்துக் கேட்க வேண்டும். நான் உங்களுக்கு பிரதான அலுவலகத்தின் இலக்கத்தை அனுப்பிவைக்கின்றேன்’ என்றார். 

எனினும், தோட்ட முகாமையாளர் உரிய அதிகாரியின் இலக்கத்தை வழங்கவோ, அழைப்புக்குப் பதிலளிக்கவோ இல்லை. 

உடரெதல்ல தொழிலாளர்கள் பிரச்சினை குறித்து நேரில் சென்று ஆராய்ந்த தோட்ட வீடமைப்பு மற்றும் சமுதாய உட்கட்டமைப்பு இராஜாங்க அமைச்சர் ஜீவன் தொண்டமான் கருத்துத் தெரிவிக்கையில்,

‘தோட்ட பராமரிப்பில் பின்னடைவு> கொழுந்து பறிக்கும் அளவின் குறைப்பாடு போன்ற காரணங்களால் தோட்ட நிர்வாகத்தினால் தொழிலாளர்களுக்கு தொடர்ந்து அரைநாள் சம்பளம் வழங்கப்பட்டதுடன் மாதாந்த கொடுப்பனவு சரியான முறையில்  வழங்கபடாதமை போன்ற காரணங்களினால் நானுஓயா உடரெதல்ல மேற்பிரிவு மற்றும் கீழ்பிரிவு தோட்ட மக்கள் கடந்த சில தினங்களாக பணி பகிஷ்கரிப்புடன் கவனயீருப்பு போராட்டத்தையும் நடத்திவருகின்றனர்.

நான் நேரடியாக உடரெதல்ல தோட்டத்திற்கு விஜயம் மேற்கொண்டு மக்கள் எதிர்நோக்கிய பல்வேறு பிரச்சினைகளை கேட்டறிந்து உரிய தீர்வை பெற்றுக்கொடுப்பதற்காக இவ்விடயம் தொடர்பாக சம்மந்தபட்ட அதிகாரிகளுடன் கலந்துரையாடினேன்.’

‘முன்மொழியப்பட்டுள்ள 20ஆம் திருத்தத்தின் மூலம் கருத்து மற்றும் ஊடகச் சுதந்திரம் மீறப்படும் அபாயம்’ -சுதந்திர ஊடக இயக்கம்

செப்டம்பர் 02 ஆம் திகதி அமைச்சரவையில் முன்வைக்கப்பட்டு அனுமதி கிடைக்கப்பெற்றுள்ள கட்டற்ற வகையில் ஜனாதிபதியின் அதிகாரங்களை உறுதிப்படுத்தியவாறு கொண்டுவருவதற்கு முன்மொழியப்பட்டுள்ள 20 ஆம் அரசியலமைப்பு திருத்தத்தின் மூலம் கருத்து வெளியிடும் உரிமை மற்றும் ஊடக உரிமைக்கு விடுக்கப்படும் பாரிய சவால்கள் தொடர்பில் சுதந்திர ஊடக இயக்கம் தனது கடுமையான கவலையைத் தெரிவிக்கின்றது.

19 ஆம் திருத்தச் சட்டத்தின் மூலம் உருவாக்கப்பட்டிருந்த ஜனநாயக அடையாளங்கள் மற்றும் கட்டமைப்புக்களை நீக்கியுள்ள 20 ஆம் திருத்தத்தின்படி கருத்து வெளியிடும் உரிமை மற்றும் ஊடக உரிமைக்கு கடுமையான சவால்கள் ஏற்படக்கூடிய ஒரு பிரதானமான விடயமாக, சுயாதீன ஆணைக்குழுக்கள் இனி சுயாதீனமற்ற நிலைக்குத் தள்ளப்பட்டிருக்கின்றமை அமைகின்றது. இவற்றுக்கான உறுப்பினர்கள் அரசியலமைப்பு சபையினாலேயே நியமிக்கப்பட்டனர். 20 ஆம் திருத்தத்தின் மூலம் அரசியலமைப்பு சபை இரத்துச் செய்யப்பட்டு பாராளுமன்ற சபையொன்று நியமிக்கப்படவுள்ளது.

மேலும், அதில் சிவில் சமூக பிரதிநிதிகள் உள்வாங்கப்படுவதும் இல்லை. ஜனாதிபதியால் ஆணைக்குழுக்களுக்கு நியமிக்கப்படும் உறுப்பினர்கள் தொடர்பில் அவதானங்களை முன்வைப்பது மாத்திரமே, அரசியல் பிரதிநிதிகளை மட்டும் உள்ளடக்கியுள்ள அச்சபைக்கு பொறுப்பாக்கப்பட்டுள்ளது. அரசியலமைப்பு சபை ஆணைக்குழுக்களுக்கு முன்மொழியும் நபர்களை ஜனாதிபதி நியமிக்கும் நடைமுறையே 19 ஆம் திருத்தத்தில் காணப்பட்டது. எவ்வாறாயினும், இனி நியமிக்கப்படுபவர்கள் ஜனாதிபதியின் விருப்பை விரும்புபவர்களேயன்றி சுயாதீன நபர்கள் அல்ல என்பது கருத்து வெளியிடும் மற்றும் ஊடக உரிமைக்கு சவாலாக அமையும். இவர்களை நியமிக்கும் அதிகாரம் போன்றே, அவர்களை நீக்கும் அதிகாரமும் ஜனாதிபதிக்கே உண்டு.

சுயாதீன தேர்தல் ஆணைக்குழுவுக்கு அரசுக்கு நெருக்கமான நபர்களை நியமிப்பதனால், நடாத்தப்படும் தேர்தல்கள் சுயாதீனமான மற்றும் சுதந்திரமான வடிவத்தைப் பெறுமா என்பது சிக்கலுக்குரிய ஒரு விடயமாகும். தேர்தல் காலங்களில் ஊடகங்கள் நடந்துகொள்ள வேண்டிய முறை தொடர்பில் வெளியிடப்படும் ஊடக ஒழுங்குமுறைகளை நடைமுறைப்படுத்தல் மற்றும் அதற்கேற்ப செயல்படுகின்றனவா என்பதைத் தேடிப்பார்க்கும் நடைமுறை சுயாதீனமற்ற ஓர் ஆணைக்குழுவால் இனியும் மேற்கொள்ளப்படுமா என்பதும் சிக்கலுக்குரிய ஒரு விடயமாகும். இதன் மூலம் மக்களின் கருத்து வெளியீடுகள் சுதந்திரமாக அமையுமா, ஊடக செயற்பாடு நியாயமாக அமையுமா என்பதும் சிக்கலக்குரிய விடயங்களாகும்.

தேர்தல் ஆணைக்குழு போன்றே அரச சேவை ஆணைக்குழு, தேசிய பொலிஸ் ஆணைக்குழு, இலங்கை மனித உரிமைகள் ஆணைக்குழு, இலஞ்சம் அல்லது ஊழல் பற்றிய சார்த்துதல்களைப் புலனாய்வு செய்வதற்கான ஆணைக்குழு போன்ற ஆணைக்குழுக்களுக்கும் ஜனாதிபதி விரும்பும் நபர்கள் நியமிக்கப்படுவதனால், அவை இனி சுயாதீனமாக இயங்குமா என்பது தொடர்பில் சிந்திக்க வேண்டியிருக்கின்றது. அவை சுயாதீனமாக இயங்காவிடின், மக்களின் கருத்து சரியாக வெளியிடப்படாது. ஊடகங்களுக்கும் சுதந்திரமாக இயங்கும் வாய்ப்பு இல்லாமல் போகும். பொலிஸ் பிரதானிகள் அரசியல் நியமனங்களைக் கொண்டவர்களாயின், மக்களின் கருத்து வெளியீடு, சுதந்திரமாகக் கூடுதல், போக்குவரத்து போன்ற மனித உரிமைகளுக்கு இடைஞ்சல் ஏற்படுவது தவிர்க்க முடியாததாகிவிடும். அறிக்கையிடும்போது ஊடகங்கள் இடைஞ்சல்களை சந்திக்க நேரிடும்.

19 ஆம் திருத்தத்தில் உள்ளடக்கப்பட்டுள்ள தகவல் அறியும் உரிமை 20 ஆம் திருத்தத்தில் மாற்றப்படாதபோதும், தகவல் ஆணைக்குழுவுக்கு எவ்வாறு நியமனங்கள் மேற்கொள்ளப்படும் என்பது தெளிவுபடுத்தப்படாதமையும் சிக்கலுக்குரிய ஒரு விடயமாகும். ஏனைய ஆணைக்குழுக்கள் போன்றே ஜனாதிபதியின் முன்மொழிவுகளின்படிதான் இதுவும் இடம்பெறுவதாயின், அதன் செயற்பாடு தொடர்பிலும் சந்தேகங்களை எழுப்ப வேண்டியேற்பட்டுள்ளது. தகவல் சட்டத்தை பயன்படுத்தி ஊடகவியலாளர்கள் மேற்கொண்ட வெளிப்படுத்தல்கள் மூலம் மக்களுக்கு கிடைத்த வெற்றிகளும் தடைப்படும். 

பிரதம நீதியரசர் பதவி உட்பட நீதிபதிகளை நியமித்தல் மற்றும் நாட்டின் உயர் பதவிகளுக்கான அனைத்து நியமனங்களும் ஜனாதிபதியால் மேற்கொள்ளப்படும் அரசியல் நியமனங்களாக மாறும்போது, கருத்து வெளியிடும் உரிமை உட்பட மனித உரிமைகளுக்கு மற்றும் ஊடக சுதந்திரத்துக்கு பிரச்சினைகள் எழுவது பற்றி சந்தேகங்கள் எழுவது தற்செயலானது அல்ல என்பது தொடர்பில் போதியளவு அனுபவங்கள் உள்ளன. ஊடகவியலாளர்களுக்கு எதிராக மேற்கொள்ளப்பட்டிருக்கும் குற்றங்கள் தொடர்பில் இப்போது ஆரம்பிக்கப்பட்டுள்ள விசாரணைகள் சிலதும்கூட, இந்நிலையில் குற்றுயிர் ஆகிவிடும் என்ற சந்தேகம் எழுவது இயல்பானதே.

மக்கள் அறிவூட்டப்படாமல், 24 மணிநேரத்தில் அவசர சட்டங்களை கொண்டுவருவதற்கான வாய்ப்பை உருவாக்கியிருப்பது ஜனநாயகத்தின் அனைத்துப் பகுதிகளையும் ஆபத்தில் வீழ்த்திவிடும் என்பதை புதிதாக் கூற வேண்டியதில்லை. எனவே, 20 ஆம் அரசியலமைப்பு திருத்தத்தின் மூலம் ஜனநாயகத்துக்கு, கருத்து வெளியிடும் உரிமைக்கு மற்றும் ஊடக உரிமைக்கு விடுக்கப்பட்டுள்ள பாரிய ஆபத்து தொடர்பில் கவனத்தை செலுத்துமாறு சுதந்திர ஊடக இயக்கம் ஊடக சமூகத்திடம் கோருகின்றது. ஒரு நாட்டின் ஜனநாயகத்தை பாதுகாக்க வேண்டிய அரசியலமைப்புக்கு முன்மொழியப்பட்டுள்ள 20 ஆம் திருத்தத்தில் உள்ளடக்கப்பட்டுள்ள கடுமையான ஜனநாயக விரோத விடயங்கள் தொடர்பில் மிகவும் விமர்சனநோக்கில் மீண்டும் ஆராய்ந்து பார்க்குமாறு பொறுப்புடைய அனைத்து தரப்புக்களிடமும் வேண்டிக்கொள்கின்றோம். 

161 நாட்களின் பின்னர் ரம்ஸி ராசிக்கிற்குப் பிணை

சிவில் சமூக செயற்பாட்டாளர் ரம்ஸி ராசிக்கிற்கு 5 மாதங்கள், 8 நாட்களின் பின்னர் இன்று கொழும்பு மேல் நீதிமன்றம் பிணை வழங்கியுள்ளது.

சிந்தனா ரீதியான ஜிஹாத் ஒன்றின் அவசியம் குறித்து முகநூலில் கருத்துக்களைப் பதிவிட்டதை மையமாக வைத்து, கடந்த ஏப்ரல் மாதம் 9ஆம் திகதி குற்றப் புலனாய்வுப் பிரிவினரால் கைதுசெய்யப்பட்டிருந்தார். 

கொழும்பு மேல் நீதிமன்றத்தில் இன்று எடுத்துக்கொள்ளப்பட்ட விசாரணையின்போது பிணை வழங்கப்பட்டுள்ளதோடு, ஜனாதிபதி சட்டத்தரணி எம்.ஏ.சுமந்திரன் ரம்ஸி சார்பில் ஆஜராகியிருந்தார். 

ரம்ஸி ராசிக் தொடர்பாக மேலும் வாசிக்க… 


நோயுற்ற நிலையில், போதிய மருத்துவப் பராமரிப்புகளுமின்றி 5 மாதங்களாக சிறைப்படுத்தப்பட்டுள்ள ரம்ஸி ராசிக்

வெலிக்கடை சிறைச்சாலை மருத்துவமனையில் சிகிச்சை பெற்றுவரும் சமூக செயற்பாட்டாளர் ரம்ஸி ராசிக் போதிய மருத்துவ பராமரிப்புகள் இன்றி, அவதியுறுவதாகத் தெரிய வருகின்றது. 

கடந்த ஒன்றரை மாதங்களுக்கு முன்னர் சிறைச்சாலை மருத்துவமனையில் ரம்ஸி ராசிக் தடுக்கி விழுந்துள்ளதோடு, அவரது ஒரு கை முறிவடைந்துள்ளது. இந்நிலையில், ஆரம்ப கட்ட மருத்துவ உதவிகள் சிறைச்சாலைகள் மருத்துவமனையில் வழங்கப்பட்டிருந்தாலும், மேலதிக மருத்துவ சிகிச்சைகளுக்காக கொழும்பு தேசிய மருத்துவமனைக்கு அழைத்துச் செல்லவேண்டியுள்ளது. 

ரம்ஸி ராசிக்கின் கையில் ஒரு சத்திர சிகிச்சை மேற்கொள்ளப்பட வேண்டியுள்ளதாகவும், அதனை மேற்கொள்ள கொழும்பு தேசிய மருத்துவமனைக்கு அழைத்துச் செல்வதில் கால தாமதங்கள் நிலவுவதாகவும் அவரது குடும்பத்தினர் கவலை தெரிவிக்கின்றனர்.

ரம்ஸி ராசிக்கை சத்திர சிகிச்சைக்காக தேசிய மருத்துவமனைக்கு அழைத்துச் செல்வதில் உள்ள கால தாமதம் குறித்து வெலிகடை சிறைச்சாலை பொறுப்பதிகாரியிடம் வினவியபோது,

‘கொழும்பு தேசிய மருத்துவமனைக்கு கைதிகள் வாரத்தில் ஒரு நாளே அழைத்துச் செல்லப்படுகின்றனர். இதனால், ஒவ்வொரு வாரமும் அதிகமான கைதிகள் காத்திருப்புப் பட்டியலில் இருக்கின்றனர். ரம்ஸி ராசிக்கை கடந்த செவ்வாயன்று (25) அழைத்துச் செல்ல இருந்தோம். எனினும், கைதிகளின் எண்ணிக்கை அதிகரித்ததால், அன்று நேரப் பற்றாக்குறை ஏற்பட்டது. அடுத்த கிளினிக் தினத்தில் அவரை தேசிய மருத்துவமனைக்கு அழைத்துச் செல்ல நடவடிக்கை எடுப்போம்’ என்றார். 

ரம்ஸி ராசிக் முகநூலில் மேற்கொண்ட பதிவொன்றை அடிப்படையாக வைத்தே, குற்றப் புலனாய்வுப் பிரிவினரால் கைதுசெய்யப்பட்டார். எதிர்வரும் 11ஆம் திகதிக்கு ஐந்து மாதங்களாகின்றன. 

ரம்ஸி ராசிக் தொடர்பான வழக்கு எதிர்வரும் செப்டம்பர் மாதம் 17ஆம் திகதி முதன்முதலாக உயர்நீதிமன்றத்தில் விசாரணைக்கு எடுத்துக்கொள்ளப்படவுள்ளன. இதுவரை காலமும் நீதவான் நீதிமன்றிலே வழக்கு விசாரணைகள் இடம்பெற்றன. சிவில் மற்றும் அரசியல் உரிமைகள் தொடர்பான சர்வதேச உடன்படிக்கைச் (ICCPR) சட்டத்தின் கீழ் கைதுசெய்யப்பட்டவர்களுக்கு நீதவான் மூலம் பிணை வழங்க முடியாத நிலை தொடர்கின்றது. 

கடந்த செவ்வாய்க் கிழமை (25) இடம்பெற்ற வழக்கு விசாரணைகளின் போது, ரம்ஸி ராசிக்குக்கு பிணை வழங்குவதற்கான ஆட்சேபனையை சட்டமா அதிபர் திணைக்களம் சார்பில் ஆஜரான வழக்கறிஞர் வெளியிட்டிருந்தார். அதனையடுத்து, இவ்வழக்கு தற்போது உயர்நீதிமன்றத்துக்கு மாற்றப்பட்டுள்ளது. 


ரம்ஸி ராசிக் கைதின் பின்னணி 


ரம்ஸி ராசிக் ஓய்வுபெற்ற அரச அதிகாரி ஒருவராவார். சமூக நீதி, இனங்களுக்கிடையிலான நல்லிணக்கம், இனவெறுப்பு செயற்பாடுகள் மற்றும் பாகுபாடுகளுக்கு எதிராக முகநூலில்  கருத்துக்களைப் பதிவுசெய்து வந்தார். 

அவரது நடுநிலைமையான கருத்துகள் மற்றும் சரளமான சிங்கள மொழிப் பயன்பாடு காரணமாக அதிகமான மாற்று மத சகோதரர்களின் நன்மதிப்பையும் அவர் பெற்றிருந்தார். 

ரம்ஸி ராசிக் ஏப்ரல் மாதம் 02ஆம் திகதி தனது முகநூல் கணக்கில், ‘தமக்கு எதிரான அனைத்து இனவாத செயற்பாடுகளுக்கும் இலங்கை முஸ்லிம்கள் சிந்தனா ரீதியான போராட்டமொன்றை (கருத்து ரீதியான ஜிஹாத்) மேற்கொள்ள வேண்டும்’ என்று அழைப்பு விடுத்திருந்தார். 

மேற்படி பதிவைத் தொடர்ந்து, முகநூல் வழியாக அவருக்கு அச்சுறுத்தல்கள் வர ஆரம்பித்துள்ளன. எனவே அவர், ‘தான் ஜிஹாதுக்கு அழைப்பதாக பலர் தனது சொற்களை தவறாகப் புரிந்துகொண்டுள்ளனர்’ எனப் பதிவிட்டு, பாதுகாப்பு நோக்கங்களுக்காக முகநூல் பாவனையையும் இடைநிறுத்தியுள்ளார்.  

தான் எதிர்கொண்ட அச்சுறுத்தல் சம்பவம் குறித்து ஏப்ரல் மாதம் 9ஆம் திகதி பொலிஸாரிடம் முறைப்பாடொன்றையும் பதிவு செய்திருந்தார். 

அவருக்கு எதிரான அச்சுறுத்தல்களை விசாரித்து, அதுவிடயமாக பொலிஸார் நடவடிக்கைகள் எடுத்ததாகத் தெரியவில்லை. மாறாக, முகநூல் பதிவொன்றைக் காரணம் காட்டி, ரம்ஸி ராசிக் ஏப்ரல் மாதம் 09ஆம் திகதி கைதுசெய்யப்பட்டுள்ளார். 

அவரது முகநூல் பதிவு குறித்து குற்றப் புலனாய்வுப் பிரிவில் முறைப்பாடு மேற்கொள்ளப்பட்டதைத் தொடர்ந்து, சிவில் மற்றும் அரசியல் உரிமைகள் தொடர்பான சர்வதேச உடன்படிக்கைச் (ICCPR) சட்டத்தின் கீழே கைது இடம்பெற்றுள்ளது.   

ரம்ஸி ராசிக் கீழ்வாதம், சிறுநீரக பிரச்சினை, கால் புண்கள் போன்ற பல்வேறு உடலியல் ரீதியான நோய்களாலும் அவதிப்படுகின்றவர்.

குடும்பத்தார் அல்லது சட்டத்தரணிகளைச் சந்திப்பதற்கான அணுகலும் ரம்ஸி ராசிக்குக்கு மறுக்கப்பட்டே வந்தது.  

ரம்ஸி ராசிக் கருத்துச் சுதந்திரம், கருத்துத் தெரிவிக்கும் உரிமையின் கீழ் தெரிவித்த அமைதியான கருத்துக்களுக்காகவே கைதுசெய்யப்பட்டு சிறைப்படுத்தப்பட்டுள்ளதாக சிவில் சமூக மற்றும் மனித உரிமை அமைப்புகள் குற்றம்சாட்டுகின்றன. மேலும், அவரது விடுதலைக்காக பல்வேறு உள்நாட்டு, வெளிநாட்டு மனித உரிமை அமைப்புகளும் குரல்கொடுத்து வருகின்றன. ரம்ஸி ராசிக் விடயத்தில் நீதி நிலைநாட்டப்பட வேண்டும் என்பதே அனைவரது எதிர்பார்ப்பாகும்.