පාස්කු ප්‍රහාරයෙන් පසු අත්අඩංගුවට ගැනීම් ගැන තොරතුරු යුද හමුදාව හංගයි

Staff Writer | Author . පරිවර්තනය කරන්න සිංහල හෝ தமிழ் 10. 10. 2019 | 12.03am
පාස්කු ප්‍රහාරයෙන් පසු අත්අඩංගුවට ගැනීම් ගැන තොරතුරු යුද හමුදාව හංගයි

අප්‍රේල් 21 වැනි දා පාස්කු ප්‍රහාරයෙන් පසු අත්අඩංගුවට ගත් පුද්ගලයන්ගේ සංඛ්‍යා ලේඛන ප්‍රසිද්ධියට පත් කිරීම ශ්‍රී ලංකා යුද හමුදාව මගින් ප්‍රතික්ෂේප කර තිබේ.

පාස්කු ප්‍රහාරයෙන් පසු පරීක්ෂා කළ නිවාස ගණන සහ අත්අඩංගුවට ගත් සැකකරුවන් ගණන සම්බන්ධයෙන් (සංඛ්‍යාලේඛන) තොරතුරු දැන ගැනීමේ පනත යටතේ කළ විමසීමකට ප්‍රතිචාර දක්වමින් යුද හමුදාව සඳහන් කරන්නේ එම සංඛ්‍යාලේඛන ජාතික ආරක්ෂාව සම්බන්ධයෙන් වැදගත් හා සංවේදී තොරතුරු බවයි.

අත්අඩංගුවට ගත් සැකකරුවන් පිළිබඳ සංඛ්‍යාලේඛන හෙළිදරව් කිරීම මගින් පාස්කු ප්‍රහාරය සබැඳිව එදින සහ ඉන් පසුව සිදු කරනු ලැබූ විමර්ශන හා පරීක්ෂණවලට මෙන්ම මේ වන විටත් සිදුකරමින් පවතින පරීක්ෂණවලට හා විමර්ශන කටයුතුවලට ද සාධනීය බලපෑමක් ඇති වීමෙන් යම් අපරාධයක් වැලැක්වීම සහ/හෝ ඒ පිළිබඳ සොයා ගැනීම සහ/හෝ ඊට සම්බන්ධ වරදකරුවන් අල්ලා ගැනීම සහ/හෝ ඔවුනට එරෙහිව නඩු පැවරීම සම්බන්ධයෙන් බලවත් අගතියක් සිදුවිය හැකි බව ද වැඩිදුරටත් නිරීක්ෂණය කරමි යනුවෙන් ශ්‍රී ලංකා යුද හමුදාවේ තොරතුරු නිලධාරී මේජර් ජනරාල් ඒ එම් එස් බී අතපත්තු මහතා සඳහන් කර තිබේ.

ඒ අනුව මෙම තොරතුරු මුදා හැරීම තොරතුරු පනතේ 5(1)(අ)(i) සහ 5(1)(ඌ)(i) වගන්ති යටතේ ප්‍රතික්ෂේප කර ඇත.

ශ්‍රී ලංකා යුද හමුදාව මෙම තොරතුරු මුදා හැරීම ප්‍රතික්ෂේප කළ ද ශ්‍රී ලකා පොලිසිය මේ වන විටත් මේ හා සම්බන්ධ සංඛ්‍යාලේඛන මුදා හැර තිබේ. මේ වන විට රඳවාගෙන සිටින සැකකරුවන්ගේ සංඛ්‍යාලේඛන බව ශ්‍රී ලංකා පොලිසිය මුදා ඇත. පොලිස් මාධ්‍ය ප්‍රකාශක පොලිස් අධිකාරී නීතීඥ රුවන් ගුණසේකර මහතා විසින්ම එම තොරතුරු මාධ්‍ය හමුවලදී ප්‍රකාශයට පත් කර ඇති පසුබිමක යුද හමුදාව එම තොරතුරු වසන් කිරීම ගැටලු සහගත බව ජ්‍යෙෂ්ඨ නීතීඥයෙක් MediaLk.com සමඟ පැවසීය.

මෙම තොරතුරු මුදා හැරීම යුද හමුදාව ප්‍රතික්ෂේප කරන්නේ ඇතැම් විට එම කාලයේ සිදුවූ නීති විරෝධී අත්අඩංගුවට ගැනීම්වලට තොරතුරු වසන් කිරීමට විය හැකියැයි ද එම නීතීඥවරයා සඳහන් කළේය.

තොරතුරු නිලධාරී බ්‍රිගේඩියර් අතපත්තු මහතා සඳහන් කරන්නේ තොරතුරු මුදා හැරීමෙන් විමර්ශන කටයුතු වලට සාධනීය බලපෑමක් ඇති විය හැකි බවයි. සාධනීය බලපෑමක් ඇතිවීමෙන් විමර්ශනවලට අගතියක් විය නොහැකි බවත්, සාධනීය බලපෑමකින් විය හැක්කේ විමර්ශනයන්ට සහායක් ලැබීම බවත් නීතීඥවරයා කියා සිටියේය.

යුද හමුදාව අදාළ තොරතුරු මුදා හැරීම ප්‍රතික්ෂේප කිරීමට එරෙහිව මේ වන විට අභියාචනයක් යොමු කර තිබේ. 

Share