ඉතිහාසයේ පළමු වතාවට ජනාධිපති අපේක්ෂකයෝ එකම වේදිකාවකට

නිලුක සදුන් | Author . පරිවර්තනය කරන්න සිංහල හෝ தமிழ் 22. 09. 2019 | 2.16pm
ඉතිහාසයේ පළමු වතාවට ජනාධිපති අපේක්ෂකයෝ එකම වේදිකාවකට

ශ්‍රී ලංකා⁣ දේශපාලන ඉතිහාසයේ පළමු වතාවට ප්‍රසිද්ධ ජනාධිපතිවරණ විවාදයක් පැවැත්වීමට කටයුතු සූදානම් කර ඇති බව මාර්තු 12 ව්‍යාපාරය සහ ඒෆ්‍රියල් තරුණ ජාලය පවසයි.

මෙහිදී ජනාධිපතිවරණයේ ප්‍රමුඛ අපේක්ෂකයන් එකම වේදිකාවකට කැඳවීම සිදු කෙරෙනු ඇත.

ඉදිරි ජනාධිපතිවරණය සඳහා තරග වදින අපේක්ෂකයන් අතරින් ප්‍රමුඛ අපේක්ෂකයන් ඔක්තෝම්බර් මස 05 වන දින සුගතදාස ගෘහස්ථ ක්‍රීඩාංගනයට කැඳවා ජනතාවට බලපාන පොදු ප්‍රශ්න 05ක් පිළිබඳව එම අපේක්ෂකයන්ගේ විසඳුම් කවරේද යන්න විමසා බැලීමට මෙහිදි අවස්ථාව සැලසෙනු ඇතැයි එම සංවිධාන පවසයි.

පසුගිය සති කීපය තුළ විවිධ පාර්ශ්වයන් සහ පුරවැසියන්  අපේක්ෂකයන්ගෙන් ඇසිය යුතු ප්‍රශ්න යොමු කර ඇති බවද, විශේෂ කමිටුවක් මගින් මෙම ප්‍රශ්න තෝරා ගැනීමට නියමිත බව ද මාර්තු 12 ව්‍යාපාරය සහ ඒෆ්‍රියල් තරුණ ජලාය පවසයි.

මාර්තු 12 ව්‍යාපාරය සහ ඒෆ්‍රියල් තරුණ ජාලය මේ ගැන පැවසුවේ කොළඹ හෙක්ටර් කොබ්බෑකඩුව කෘෂි පර්යේෂණ මධ්‍යස්ථානයේ අද (22) පැවැති මාධ්‍ය හමුවක් අමතමිනි.

මේ සඳහා ආරාධනා කරනු ලබන දේශපාලන පක්ෂ පිළිබඳව ද මෙම කමිටුව විසින් තීරණය කරනු ලබන බවත්, සෑම අපේක්ෂකයකුටම ප්‍රශ්න 06ක් හිමි වන අතර සෑම අපේක්ෂකයකුට ම සමාන කාලයක් ලැබෙන බවත්,  ප්‍රශ්න හයෙන් පහක් ම කල් ඇතිව ලබා දෙන අතර, අවසාන  ප්‍රශ්නය අහඹු ලෙස ඔවුනට තෝරා ගැනීමට ඉඩකඩ ලබා දෙන බවත් මාර්තු 12 ව්‍යාපාරියේ නියෝජිතයෝ සහ ඒෆ්‍රියල් තරුණ ජාලයේ නියෝජිතයෝ පැවසූහ.

මෙම වැඩසටහනේ අවසානයේ විනාඩි තුනක විවෘත කාලයක් සෑම අපේක්ෂකයෙකුටම හිමි වේ.

මෙම වැඩ සටහන සජීවීව විකාශනය කිරීමට සැලසුම් කර ඇති බැවින් මහජනතාවට නිවසේ සිටම එය දැක බලා ගැනීමට හැකියාව ඇතැයි ඔවූහු පැවසූහ.

එදිනට එෆ්රියල් තරුණ ජාලය මගින් පුරවැසි නිරීක්ෂකයන් 3000 සමාජගත කිරීමට ද සිහින ජනපති තේමාව යටතේ කරනු ලැබූ සංවාද හරහා මතු වූ ජනතා අදහස් ඉදිරිපත් කිරීම ද , ජනාධීපතිවරණ අපේක්ෂකයන් මැතිවරණ ව්‍යාපාරය පවත්වාගෙන යනු ලබන ආකාරය ගැන අපේක්ෂකයන්ගේ පොරොන්දු ලබා ගැනිමට ද අපේක්ෂිත බව මෙම වැඩසටහනේ සංවිධායකයෝ පැවසූහ.  

ශ්‍රී ලංකාවේ මැතිවරණ ඉතිහාසයේකිසිදු දිනක ජනාධිපති අපේක්ෂකයන් එකම වේදිකාවකට කැඳවිම මෙතෙක් සිදුවි නොමැති බව කී සංවිධායකයෝ මෙය දේශපාලන සංස්කෘතියේ හැරවුම් ලක්ෂය බව ද පැවසූහ.  

මෙම මාධ්‍ය හමුවේදී මාර්තු 12 ව්‍යාපාරය සහ ඒෆ්‍රියල් සංවිධානය නියෝජනය කරමින් පහත මහත්ම මහත්මීහු අදහස් දැක්වූහ.

1.රෝහණ හෙට්ටිආරච්චි (පැෆ්රල් සංවිධානය සහ මාර්තු 12 ව්‍යාපාරයේ කැඳවුම්කරු)

2. රවින්ද්‍ර ද සිල්වා (එෆ්රියල් තරුණ ජාලය)

3. මංජුල ගජනායක (මැතිවරණ ප්‍රචණ්ඩ ක්‍රියා නිරීක්ෂණ මධ්‍යස්ථානය)

4.ශශී ද මෙල් (ට්‍රාන්ස්පේරන්සි ඉන්ටනැෂනල් ශ්‍රී ලංකා)

5. නීතීඥ එස්.ජී. පුංචිහේවා (ප්‍රජාතාන්ත්‍රී අයිතාවාසිකම් රැකගැනීමේ ව්‍යාපාරය)

6.උපේක්ෂි ප්‍රනාන්දු (මාර්තු 12 ව්‍යාපාරය)

7.ප්‍රභාත් චන්ද්‍රකීර්ති (ශ්‍රී ලංකා පරිපාලන සේවා නිලධාරීන්ගේ සංගමයේ සභාපති)

8.චන්ද්‍රා ජයරත්න (වාණිජ්‍ය සංගමයේ හිටපු සභාපති, ෆ්‍රයිඩේ ෆෝරම්)

9.සචින්ත දුලංජන (යොවුන් පාර්ලිමේන්තු හිටපු කථානායක)

10.රොයෙල් රේමන් (එෆ්රියල් තරුණ ජාලය)

11. ජනිත් රුක්මාල් (එනේබල් ලංකා)

12. බ්‍රයන් ගුණරත්න (තරුණ ජාලය)

Share