අකිල ධනංජයට දෙවැනි වතාවටත් චෝදනාවක්

Staff Writer | Author . පරිවර්තනය කරන්න සිංහල හෝ தமிழ் 20. 08. 2019 | 1.27pm
අකිල ධනංජයට දෙවැනි වතාවටත් චෝදනාවක්

මාස දහයක් තුළ දෙවන වරටත් ශ්‍රී ලංකා ක්‍රිකට් කණ්ඩායමේ පිට දඟ පන්දු යවන ක්‍රීඩක අකිල ධනංජයගේ පන්දු යැවීමේ ඉරියව්ව සැක සහිත බවට චෝදනාවක් ලැබී ඇතැයි අන්තර්ජාතික ක්‍රිකට් කවුන්සිලය පවසයි.

ඔහුට ඉදිරි දින 12 තුළ ඉරියව් පරීක්ෂණය⁣ට භාජනය වීමට සිදුවනු ඇත.

ඔහු මෙම පරීක්ෂණය අසමත් වුවහොත්,ඔහුට වසරක තරග තහනමක් පැනවෙනු ඇත. වසර දෙකක කාලයක් තුළ එම පරීක්ෂණය දෙවරක් අසමත් වූ පන්දු යවන්නන්ට අන්තර්ජාතික ක්‍රිකට් කවුන්සිලය වසරක තහනමක් පනවයි.

ඔහුට මෙන්ම නවසීලන්ත ⁣නායක කේන් විලියම්සන්ගේ පන්දු යැවීමේ ඉරියව්ව සැක සහිත බව නවසීලන්තය සහ ශ්‍රී ලංකාව අතර පළමු ටෙස්ට් තරගයේ විනිසුරුවරුන් තරග තීරකට දැනුම් දී තිබේ.

ඔහු 2014දී ඉරියව් පරීක්ෂණය අසමත් වූ නමුත් මෙම පරීක්ෂණය අසමත් වූවත් වසරක තරග තහනමක් නොලැබෙනු ඇත.

ධනංජයට පසුගිය වසරේදී ඉරියව්ව සම්බන්ධයෙන් චෝදනා එල්ල වූ අතර මෙම වසරේ මුල ඔහුගේ වෙනත් ඉරියව්වක් පරීක්ෂණයට භාජනය කෙරුණු අතර එයට අයිසීසීයේ අවසරය හිමි විය.

ඉන් අනතුරුව ඔහු එක්දින තරග ක්‍රීඩා කළ මුල් මාස කිහිපය තුළ කඩුළු අතරට පැමිණිමට නොහැකි වූ අතර ඒ හේතුවෙන් 2019 ලෝක කුසලාන සංචිතයේ ස්ථානය ද අහිමි විය. 

එම සිද්ධියෙන් පසු ඔහු ටෙස්ට් තරගයක් ක්‍රීඩා කළ පළමු අවස්ථාව නවසීලන්තය සමග පැවැත්වූ මෙම පළමු ටෙස්ට් තරගයයි.එහි පළමු ඉනිමේදී ඔහු ලකුණු 80 කට කඩුලු 5 ක් ලබා ගත්තේය.

වසරක තරග අත්හිටුවීමක් සිදුවුවහොත් එය ධනංජයගේ ක්‍රිකට් දිවියට බරපතල පහරක් පමණක් නොව එය ශ්‍රී ලංකාවේ දඟ පන්දු යැවීමේ බලඇණියේ සමබරතාවටද දැවැන්ත පහරක් වනු ඇත.

ශ්‍රී ලංකා කාලසටහනේ ඊළඟ ටෙස්ට් තරග සියල්ලම ආසියාවේදී පැවැත්වීමට නියමිතය. 

නවසීලන්තයට එරෙහිව ශ්‍රී ලංකාවේ දෙවන ටෙස්ට් තරගය බ්‍රහස්පතින්දා ආරම්භ වේ. ධනංජය සහ විලියම්සන් යන දෙදෙනාටම එම තරගයේදී පන්දු යැවීමට අවස්ථාව හිමි වෙයි.

ESPN ඇසුරෙනි


Share